uMthunywa
Langelihle Moyo
INHLANGANISO ye-Veterinary Services isixwayise bonke abafuye inkomo ezabelweni zeMatabeleland ukuthi bavikele inkomo zabo kumkhuhlane ovame ukuhlasela inkomo ngalesisikhathi owe-lumpy skin.
Oyingcitshi kwezezifuyo kunhlanganiso le, esabelweni seMatabeleland North uDokotela Vernon Tutsirai Dziruni ukhuthaze bonke abafuyileyo ngomkhuhlane we-lumpy skin ovame ukuhlasela inkomo ngesikhathi lesi esesikhangelane laso esokutshisa lesezulu.
“Umkhuhlane we-lumpy skin uvame ukuthwalwa yizibungu ezimunya igazi ezibalisela imiyane, izibawu lemikhaza, njalo umkhuhlane lo ubangela ukuthi inkomo zingabe zisazala kuhle.
“Nxa inkomo isihlaselwe ngumkhuhlane lo ibonakala ngokuba lezilonda kumbe amaqhubu emzimbeni, iyabe ingasachelesanga isilala iphinde njalo itshise umzimba.
“Umkhuhlane lo uyingozi ngoba uyabulala njalo lesibaya kungenzeka sivalwe ngenxa yalo umkhuhlane nxa umlimi engekela ukunanzelela. Enkomeni ezingakaze zigule kumbe zihlaselwe ngumkhuhlane lo, kumele zihlatshwe amajekiseni,” kutsho uDkt Dziruni.
“Okunye elingakusebenzisa ukuvikela inkomo kumikhuhlane lo yikuthi inkomo zihlatshwe.”
Uphethe ngokuthi wonke ofuyileyo ulomlandu wokunanzelela lokuvikela izifuyo zakhe emikhuhlaneni.
“Lingameleli ukuthi inkomo zize ziqalise ukugula khona lizazelapha ngoba nxa sezigula kudla kakhulu esikhwameni kwesinye isikhathi lenkomo yakhona icine isifa ngemva kokuthenga imithi ebizayo, ngakho-ke ngilikhuthaza ukuthi asiphangiseni ukuvikela inkomo zethu emikhuhlaneni ukuze singalahlekelwa yizifuyo zethu,” kuphetha uDkt Dziruni.
