uMthunywa
Loice Msimanga
ISIKHATHI sentwasa yiso isikhathi esihle sokuvundisa amasimu kungakho abalimi bakhuthazwa ukuthi bekele amahlanga abolele emasimini ukuze avundise umhlabathi.
Abalimi kumele babuthelele utshani bengabutshisi, bafake umquba emasimini.
UNkosazana uTreggy Mpofu ukhuthaze abalimi ukuthi bakhuthalele ukuvundisa amasimu abo ngomquba kuthi nxa sebelimile sebezafaka futhi lomvundiso kaHulumende.
“Abalimi kumele nxa belima bengalandeli lapho okugelezela khona umfula. Laba abalima emadolobheni kumele balandele imithetho yekhansili.
“Abalimi bangenzi imisebenzi eguguda umhlabathi ngoba kucina kubangela ukuthi bangabi lesivuno esihle,” kutsho uNkszn uMpofu.
Abalimi bakhuthazwa ukuthi nxa befaka umvundiso onjenge-lime basebenzise isilinganiso esiqondileyo.
“Abalimi nxa befaka i-lime kumele basebenzise izilinganiso eziqondileyo ukuze umhlabathi ube lobumunyu obuyibo obudingakalayo.
“Isikhathi esihle sokufaka i-lime yiso lesi esebusika ukuze kuhlangane lobumanzi bomhlabathi besigaba esedluleyo. Kulabo abalima ugatshopo ensimini ele 15cm x 15cm kumele bafake i-2 000kg kuhekitha.
“Kukanti labo abalima kumahlabathi bakhuthazwa ukuthi bafake i-lime enengi ngoba izulu lingana umhlabathi uyageleza. Kukanti labo abasezidakeni akumelanga bafake i-lime enengi kakhulu ngoba lokho kuyabulala ukuvunda komhlabathi.
“Ubumunyu lobu buyabulala izinanakazana ezincedayo emhlabathini yikho sisithi bangaze bafaka enengi,” kuphetha uNkszn Mpofu.
