uMthunywa
Langelihle Moyo
INHLANGANISO ye-Agricultural Rural Development and Advisory Services, esabelweni se-Matabeleland North isixwayise izakhamizi labalimi kanye labafuyileyo ngokuqakatheka kokulondoloza amadlelo.
UMqondisi kunhlanganiso le esabelweni seMatabeleland North uMnumzana Dumisani Mbikwa Nyoni uthe kuqakathekile ukuthi uzulu alondoloze amadlelo ngokwenqabela imlilo engacina itshisa amadlelo.
“Ukuqalwa komlilo osuka umemetheke utshise iganga lamadlelo sokuvamile esabelweni se-Matabeleland North. Isabelo lesi yiso esilesilinganiso esiphezulu semlilo ecina itshisa iganga. Isikhathi lesi esikuso yiso isikhathi esibi lapho abantu belungiselela amasimu njengoba isikhathi sokulima sesifikile.
“Imlilo imemetheke nxa sokutshiswa amahlanga omumbu, amabele lamabibi. Ekutshiseni lapho abantu basuke balibale ukuvula imikhandlo yokuvikela imlilo. Okunye okwenza imlilo imemetheke yikuthi inengi labantu batshisa amabibi ebusuku besokusiba lomoya umlilo ubusumemetheka sutshisa iganga ubhidlize amadlelo lezinanakazana,” kulandisa uMnu Nyoni.
Uphethe ngokuxwayisa uzulu ukuthi avule imikhandlo yokuvikela imlilo ngoba lokhu kuyancedisa ekulondolozeni amadlelo.
“Asivulenini imikhandlo yokuvikela imlilo ukuze senelise ukulondoloza amadlelo ezifuyo zethu. Amadlelo aqakathekile ikakhulu ezifuyweni ezigoqela inkomo.
“Nxa kulamadlelo athe xaxa lokhu kwenza inkomo zibe lenyama elohlonzi ngoba ziyabe zisutha,” kuphetha uMnu Nyoni.
