uMthunywa
Nkosilathi Sibanda
UCOSMAS ‘‘Tsano’’ Zulu usekhuthaze abadlali beqembu leHighlanders ukuthi kumele bafunde njalo baziphe umlandu wokunqoba kumidlalo elemali.
UTsano usekhulume kanengi ukuba imidlalo yenkezo iqakathekile kakhulu empilweni zabadlali, yikho nje eze waqonqosela lokhu kusasele amalanga ambalwa ukuthi iHighlanders ingqikilane leFC Platinum kunkezo yeEasy Call ngeSonto.
Ithimu yeHighlanders kulisizini sekuzikhanyela ukuthi ayilamdladla wokuba yingqwele yenguqu nanko phela kulisizini akula nkezo elesisindo esekhabothini yeBosso.
Kuliviki kubikwa uTsano kanye labaqeqetshi bakhe uAmin Soma-Phiri lomsekeli uMelusi Sibanda bachaze ukuthi inkezo yeNetOne kumele iphakanyiswe yiBosso.
Kubikwa abaqeqetshi baqonqosele ngalokhu bekhuthaza abadlali ukuthi le yiyo yodwa inkezo ezaphendukisa inhlonipho eqenjini.
Ebuzwa ngamalungiselelo enkezo le kuliviki, uTsano walile ukutsho okunengi. Uthe utshele abadlali ukuthi babophe ziqine.
“Akula engingakutshela khona ngokulolonga kwethimu ngaphandle kokuthi abafana batshelwe ukuthi inkezo le itsho okunengi kuqembu leHighlanders.
“IHighlanders icine nini ukuthwala inkezo encintiswa ngamathimu wonke la? Yikho-ke ngisithi abadlali bayazi ukuthi balomsebenzi onganani nxa bedlala leFC Platinum. Sikhuluma ngemali lapha. Ngabe bacabanga njengami, aluba bayazi ukuthi inkezo yeNetOne ifana leKhisimusi,” nguTsano lo ekhuluma loMthunywa.
Iphephandaba likazulu lixhumane loJohn Nyashanu isikhulumi seNetOne, abasekela ngemali inkezo le.
UNyashanu uthe inkampani yakhe isidonse zonke intambo yalungiselela ukuthi inxuse amathimu enkundleni.
“Njengoba sekusaziwa ukuthi ithimu lethimu izadlala ngaphi, thina njengeNetOne sithanda ukubika ukuthi inkezo le siyisekela ngoba inguqu ngeyabantu njalo abantu laba yibo abasekela inkampani yethu.
“Sikhiphe imali engange-$443 000 ezasebenza ukuqhuba umncintiswano lo uze uyephela. Phakathi kwalimali, iNetOne ikhethe ukuthi inikeze umanqoba wenkezo
i$80 000, ithimu ezahlala kunombolo yesibili ku-final izaphiwa i$50 000,” kuchasisa uNyashanu.
Amathimu azaphelela kusigaba sokuqala azaphiwa i$20 000 inye ngayinye.
Kumbiko othunyelwe uMthunywa ngemeyili izolo, inkampani yeNetOne ithe izathenga konke okufunwa ngamaqembu. Lokho kutsho ukuba abadlali bazabhadalelwa izindlu zokulala emawoteleni, impahla zokugqoka, indleko zokuhambisa kanye leholo.
“Imidlalo iqala mhlaka 14 kulinyanga njalo sikhangelele ukuthi i-final idlalwe mhlaka 12 Mpalakazi esigodlweni.
“Kubalandeli bamathimu la akunkezo yethu sithi bebuye ngobunengi babo ngoba bazakholisa okunengi ngaphandle kokubukela inguqu. Sithembisa ukuthi imidlalo yenkezo le izakubamnandi ukwedlula yonke imincintiswano esiyibukele kulisizini,” kutsho umbiko weNetOne.
Kweminye imidlalo, inkunzi zeligi yePSL kulezinsuku iChicken Inn zingena umango omude zisiyadlala leZPC Kariba enkundleni yeNyamhunga.
Ngelanga elifanayo, iHwange izabe isesigodlweni inxuswe yiCaps United eNational Sports Stadium.
IDynamos izathola ithuba lokuvala amanxeba okudliwa yiTriangle. IDembare idlala leHow Mine khonale esigodlweni.
