uMthunywa
Langelihle Moyo
INHLANGANISO ye-Agritex isikhuthaze abalimi ukuthi baqalise ukuhlanyela njengoba izulu seliqalisile ukuna kodwa balimi inhlanyelo eziphangisa ukuvuthwa ngoba isikhathi sesihambile.
Ingcitshi kwezokulima, uMqondisi kunhlanganiso le esabelweni seMatabeleland North uMnumzana Dumisani Mbikwa Nyoni ukhuthaze abalimi ukuthi bahlanyele ngalonaleli izulu elinileyo.
“Ngithanda ukukhuthaza abalimi ukuthi kabahlanyele ngezulu lonaleli elinileyo, kodwa-ke esibakhuthaza ukuthi bahlanyele yilabo abathole izulu elifika ku30mm kusiya phezulu. Ekuhlanyeleni lapha abalimi sibakhuthaza ukuthi bandise indima zamabele lenyawuthi ngoba lezi izilimo ziyenelisa ukumelana lokoma.
“Besokusithi labo abafuna ukuhlanyela umumbu, sibakhuthaza ukuthi bahlanyele inhlanyelo ephangisa ukuvuthwa ezathatha insuku eziphakathi kwezingu-100 kusiya kwezingu-115,” kuchasisa uMnu Nyoni.
Ubuye wathi kulabo abangakatholi izulu labo bangahlanyela beyenza lokho okuthiwa yi-dry planting.
“Kulabo abangakatholi izulu ngilikhuthaza ukuthi lenze i-dry planting. I-dry planting yenziwa umhlabathi womile, hatshi umhlabathi olunama, nxa lingahlanyela umhlabathi ulunama inhlanyelo iyabola kumbe ihambe imila lapha lalapho. Okunye esingabe sikwenza sisamelele izulu yikuthi sibesiphendula indima zethu ukwenzela ukuthi izulu lingana sihle sihlanyele,” kulandisa uMnu Nyoni.
Uthe ngemva kokuhlanyela ukhuthaza abalimi bonke ukuthi bakhangele emasimini abo lasendimeni zabo ukuthi yiluphi ukhula oluhluphayo.
“Kuqakathekile ukuthi umlimi abekwazi ukhula oluhluphayo emasimini akhe, lokhu kuyancedisa nxa esesiyathenga umuthi wokuchela esithi thina ngama-herbicides. Nxa lingela lwazi liyenelisa ukubiza abalimisi bendawo bazolincedisa,” kuphetha uMnu Nyoni.
