uMthunywa
YiNtatheli kaMthunywa
NGETHUBA izakhamizi zisuka lapho ezazihlala khona zisiyahlala eSilverton eduze lamangcwaba eThembalethu, George eCape Town kweleSouth Africa zazingazi ukuthi kukhona okungazihlupha kanti ziziholela amanzi ngomsele kodwa khathesi sezifisa ukusuka kule indawo ngenxa yesipoko esizithwalise nzima.
Kubikwa isipoko lesi sizithwalise nzima izakhamizi lezi nanko phela sibanga umsindo omkhulu ebusuku sikhanyisile sibuye njalo sibukele ibhola kumabonakude phakathi kobusuku.
Isipoko lesi kubikwa sikhathaza phakathi kobusuku ngokuvula impompi zamanzi sibuye njalo sizwakale sesikhanda izivalo zezambuzi okudala umsindo omkhulu kakhulu.
UMnumzana Siphamandla Ngcono (38) ubikele intatheli ukuthi imuli yakhe iqale ukuhlutshwa yisipoko lesi ngoMfumfu kumnyaka ophelileyo beqala ukuhlala kule indawo.
“Isipoko lesi saqala ukusihlupha ngenyanga kaMfumfu kumnyaka ophelileyo. Phakathi kobusuku uzwa izinja zikhonkotha kakhulu indawo yonke nxa uthi uyalunguza phandle ubone izithunzi yodwa,” kutsho uMnu Ngcono.
Uqhubeke njalo walandisa ukuthi isipoko lesi senza yena lomkakhe uNothemba Situngo (31) bengalali labantwababo bawumane ebusuku.
“Isipoko lesi sisithwalise nzima ngoba senza njalo singabi lobuthongo lomkami kuthi abantwabethu balale bekhuluma izinto ezingaqedakaliyo. Lokhu kudala ukuthi sizibukelele inguqu yemazweni kumabonakude.
“Isimanga yikuthi nxa sibukele inguqu le mihla yonke ibhola lingahlohlwa sizwa umsindo osabantu abajabulela ibhola elihlohliweyo emangcwabeni la okutshengisa ukuthi izipoko lezi ziyabe zibukele lathi.
“Ngachela ngentelezi kule indawo kodwa akungincedanga ngalutho kungakho-ke ngikubona kungcono ukuthi sithuthe sibuyele eMdongwe ngoba ngeke ngikumele lokhu,” kuchaza uMnu Ngcongo.
UMnumzana Siphosethu Magotyana uveze ukuthi uhlala esizwa umsindo wamanzi aphuma empompini phandle ebusuku lezisinde zabantu aze alahlise ngokubhema kumbe ukunatha utshwala ukuze athole ubuthongo.
Omunye wezakhamizi zakule indawo uchaze ukuthi wandise ukutshisa impepha ngesizatho sokuxotsha izipoko lezi.
Ubuye njalo wachaza ukuthi okudala ukuthi kube lezipoko kule indawo yikuthi izakhamizi azilandeli kahle imikhuba yokungcwaba nxa zingcwaba abantu bazo.
Isangoma uMakosandile Toto ubikele intatheli ukuthi izipoko lezi ngezabantu ababulawa yikuloywa.
“Abantu laba ngabafa bebulawa yikuloywa ngokukhwebulwa ngakho bazingozi kakhulu. Okwenza benze imigilingwana le yikuthi bafuna ukubuyela empilweni ngoba bafa kubi. Thina ngeke sibabone ngawethu amehlo,” kuphetha isangoma uToto.
