uMthunywa
Ethel Ncube
BASELE besegcekeni abafundi besikolo se-Avoca Primary eFilabusi ngemva kokuba izulu elilomoya omkhulu lithethe uphandla lwezindlu zokufundela ngoMvulo kuyonale iviki.
UMthunywa uzwe ukuthi izulu leli eline ngehola lesibili emini litshiye amakilasi amabili engelaphahla osekusenza abafundi bafundele egcekeni.
Ekhuluma loMthunywa uMnumzana Themba Tshuma ongumzalli uchaze ukuba izulu eline ngoMvulo litshiye umonakalo esikolo sabo.
“Izulu elinileyo belilesiqhotho njalo lomoya omkhulu, sibonga nje ukuthi abantwana besebephumile esikolo ngoba lamazenge athe ethathwa ngumoya akulamuntu olimeleyo. Kusukume amazenge kunye lamapulanka,” kutsho uMnu Tshuma.
Intatheli iphinde yaxhumana lesinye isakhamuzi uMnumzana Samuel Moyo laye ogcizelele ukuba isikolo sisele singokunye.
“Izulu leli libuye lilomoya liduma lingadlali lathatha uphahla lwesikolo lwayawela le izindlu zokufundela zasala zikhamisile zingasela phahla, amazenge esegcwele phansi. Esikubongelayo yikuthi akulamuntu olimeleyo ngesikhathi kusenzakala lokhu,” kubika uMnu Moyo
UMthunywa uxhumane loProvincial Education Director weMatabeleland South uNkosikazi Beatrice Manjere uchaze ukuba indaba enjalo useyamukele.
“Umbiko wokuba kulesikolo esilophahla oluthethwe ngumoya eAvoca ngilwamukele kodwa akuthathangwa izindlu zonke zokufundela kulezinye eziseleyo lapho abafundi abazabe befundela khona,” kuphetha uNkkz Manjere.
