uMthunywa
Charity Moyo
UKWENDISWA kwabontanga abangaphansi kweminyaka engu-16 sokuyindaba esegudwini njalo esisenza inhlanganiso ezimela amalungelo abantwana zizame ukuphemba indlela yokulwisa lokhu.
Kumhlangano oqhutshwe ngoLwesibili kuyonale iviki eMasiye Conference Centre obukhokhelwa yiScripture Union Thuthuka kanye leNational Aids Council bekuhloswe ukuthi kuphunywe lamaqhinga okuthi ukwendiswa kwabantwana lokhu kuphele.
Umkhosi lo uqhutshwe ngaphansi kwendikimba ethi, Asiqedeni ukwendiswa kwabantwana eZimbabwe (Ending Child Marriages in Zimbabwe).
UNkosikazi Musa Sibindi onguProgrammes Officer kunhlanganiso yeOxfam uthe abantwana akumelanga bendiswe bebancane ngoba umendo kunye lokuthatha ngumthwalo omkhulu kibo.
“Nxa sikhuluma ngomntwana sitsho umuntu ongaphansi kweminyaka elitshumi lasithupha, pho nxa sizamendisa kumbe sithi athathe engaphansi kweminyaka le siyabe sisithi athini?”
Kuvele ukuba ezinye izizatho ezenza abantwana bathathe kumbe bende bebancane yikuswela uthando ebazalini babo. Ontanga kumele bathandwe njalo bafundiswe ukuthi isikolo siqakathekile.
Uqhubekele phambili esithi enye imbangela ngamasiko. “Kwezinye indawo kulisiko ukuthi umntwana endiswe emncane. Kukanti ezinye inkonzo ezinjengezama Postoli kuyaziwa ukuthi kuvunyelwe ukuthi abantwana bendiswe bebancane ngoba kuthiwa kulandelwa umoya,” kutsho uNkkz Sibindi
Ukwenda kwabantwana abangaphansi kweminyaka engu-16 sokubangele ukuthi ubuyanga buqhubekele phambili ngoba labo bantwana kabenelisi ukugcina imuli zabo.
UNkkz Sibindi uveze ukuthi kuqakathekile ukuthi abantu bafundiswe ngomthetho kanye lokuqakatheka kokuthi abantwana basiwe esikolo ngoba lokhu yikho okungaphathisa ukuthi kwehliswe inani labantwana abendiswa bebancane.
UNkkz Sibindi uphethe ngokuthi kungumlandu womuntu wonke ukuthi avikele abantwana ekwendisweni bebancane ukuze ikusasa labo libe lihle.
