uMthunywa
Buhlebenkosi Gaule
ABALIMI sebekhuthazwe ukuthi bangesabi ukulima amatamatisi ngesikhathi somqando ngoba lokhu kulakho ukubalethela imali enhle nxa kuyikuthi bawanakekele kuhle.
UMnumzana Ronnie Mpofu ongumlimi wakoGodlwayo eZimbili uthi kulula ukuthola isivuno samatamatisi esihle langesikhathi somqando kungakho-ke abalimi akumelanga besabele khatshana ngoba okudingakalayo nje yikunakekela isilimo sakho ubusuzithaphuzela imali ungavuna.
“Amatamatisi kayisiwo zilimo ezingahlanyelwa nje loba yisiphi isikhathi kodwa ngesikhathi somqando amatamatisi alakho ukulethela abalimi imali ngoba bayabe bebalutshwana abalimi abenelisa ukuwalima ngoba besesaba ukuthi angatshazwa ngumqando,” kutsho uMnumzana Mpofu.
Uqhubekele phambili wathi okwenza abalimi bathandabuze ukulima amatamatisi ngesikhathi somqando yikuthi bacabanga ukuthi kuyabe sokudingakala ukuthi umlimi athenge impahla etshiyeneyo yokuvikela amatamatisi.
“Abalimi kumele babekwazi ukuthi bangazitholela imali enhle nxa bangalima amatamatisi ngesikhathi somqando ngoba balutshwana abalimi abawalimayo ngalesisikhathi.
“Abanengi bakhala ngokuthi isilimo lesi sidinga ukuba umuntu abe lama-green house ngesikhathi somqando njalo bathi kuyadula ukuba abalimi benelise ukuwathola,” nguMnu Mpofu lo.
UMnu Mpofu uthe abalimi balakho ukusebenzisa indlela zesintwini ukuze bavikile isilimo sabo ukuba zingatshazwa ngumqando ngokunanzelela indlela abathelela ngayo.
“Abalimi abanengi bathi amatamatisi afuna i-green house ezancedisa ngokuvikela amatamatisi ngesikhathi somqando kodwa kabazi ukuthi amanzi nje ayenelisa ukunceda ukuthi amatamatisi engatshazwa ngumqando.
“Abalimi bayenelisa ukusebenzisa ama-sprinklers nxa bethelela ngoba nxa ethelela ayabe efafaza phezulu, lokhu yikho okuzanceda ukukhithiza ungqwaqwane oyabe uhlezi phezu kwamahlamvu amatamatisi okuzavikela ukutshazwa.
“Ngemfanelo izilimo ezinjengamatamatisi, lendumba lemibhida ziyabe zifuna ukuthelelwa ngamanzi ayabe engena emhlabathini kodwa lawa awe-sprinkler ayabe efuna ukuthelelwa phezulu ngamahola ekuseni kusenzelwa ukuthi ingqwaqwane zekuseni zikhithike”, kutsho uMnu Mpofu.
UMnu Mpofu uphethe ngokuthi abalimi nxa bengakabi layo i-green house benelisa ukusebenzisa yonale indlela yokuthelela njalo nxa bekhuthalele lokhu bazaphumelela bathole isivuno esihle bazitshayele imali.
