uMthunywa
Langelihle Moyo
KUZABE kungabizwa ozwayo mhlaka 22 kuyonale inyanga koNtuthu Ziyathunqa eWhite City Stadium, kuZiyakhala Festival lapho okuzakuba lomcimbi omkhulu ozahlanganisa amaSoul Brothers kunye loShongwe abahlabeleli bakweleSouth Africa.
Kuzabe kunyathelwana kulo umcimbi njengoba kuzaba labanye abahlabeleli bakuleli ababalisa uMadlela Skhobokhobo, Insimbi ZeZhwane, Zinjaziyamluma, Mandla Dube, Mpilo Ndlovu, Lindokuhle Mkhize, loLaDee kunye lelinye iqembu elivela kweleSwaziland eleKhuphuka Group.
Ekhuluma lentatheli kaMthunywa uMandla Dube ongomunye wabahlela umcimbi lo, uthe umcimbi lo ujonge ukuhlanganisa abahlabeleli abahlabela umculo otshiyeneyo kunye lokuvuselela amasiko ngomculo.
“Sikhangelele ukuhlanganisa abahlabeleli abahlabela umculo owehlukeneyo abagoqela iNsimbi zeZhwane, amaSoul Brothers, Shongwe, Madlela Sikhobokhobo kanye labanye abanengi. Umcimbi uzaqala ngehola lika 2 emini kuze kube phakathi kwamabili,” kuchasisa uDube.
“Asambeni ngobunengi siyekudla ukudla kwamehlo ngoba ukutshelwa yikuncitshwa. Ziyabe zikhala njengoba lebizo lomcimbi lisitsho.
“Umcimbi lo ujonge ukuhuga abantu abathanda umculo wezokholo, rhumba, amaSololo, leminye etshiyeneyo ukuthi babe ndawonye bethokoza,” kuphetha uDube.
