uMthunywa
YiNtatheli kaMthunywa
UMGADLI weHighlanders uPrince Dube kasoze ayedlala kweleHolland njalo kulisizini akayindawo loba sekutheni, kutsho umaqhuzu weqembu uNdumiso Gumede.
UGumede ukhulume amazwi la elandula imbiko ememetheke kuliviki ibika ukuthi uDube usebizwe ngelinye iqembu elidlala ezweni leHolland elimfuna ngamehlo abomvu.
Umaqhuzu wethimu yezwe lonke ubikele iphephandaba likazulu ukuba imbiko ivele ebantwini abalenjongo yokubhidliza iHighlanders ngoba bebona ukuthi ithimu isiqinile.
Uthe iHighlanders ayizimiselanga ukwehlukana lalumdlali. UDube ngumgadli osethole inhlonipho kubalandeli benguqu kuleli kulandela ukudlala kuhle akwenzayo kulezinsuku lokuthi nguye owabhoboza iDynamos kumdlalo wePSL. Ngenxa yalumdlalo iHighlanders yenelisa ukwephula isiqalekiso sokudliwa yithimu le okweminyaka eyisitshiya galolunye.
“Ngamanga aluhlaza lawo. Akulathimu yeHolland ecela uPrince Dube. Lami ngikuzwe kumbiko le okuthiwa yi-social media. UPrince ngumdlali wethu njalo uyalolonga leHighlanders okwamanje,” kutsho uGumede ngoLwesithathu.
Kuvele ukuba umbiko “wamanga” lo umangalise umqeqetshi uErol Akbay.
“Lomqeqetshi kazi lutho. Sonke kuyasimangalisa lokhu,” kuchaza uGumede.
UGumede uqhubeke wathi abasoke bazihluphe ngamahungahunga ahlose ukudiliza iHighlanders ngoba bakhangelele umdlalo wabo ozayo leqembu leTriangle ngeSonto Emagumeni.
Kusenjalo, uRahman Kutsanzira ubike ukuthi ulethemba lokuthi uzaphenduka enkundleni ngokuphangisa. Umdlali lo ubelimele kodwa uthe usesizwa ngcono okuyikhona okumenza azethembe ukuthi usezadlala.
“Ngimelele ukuthi odokotela bangivumele ukuthi ngidlale. Ngiyazizwa ukuthi ngilamandla okudonsa umdlalo njalo sengikhanuka ukuyatshibilika,” kutsho lumdlali ngoLwesibili.
