uMthunywa
Wayne Ncube
WALILE wathi kazange aphiwe incwadi yokuthi kumele anqobe imidlalo emithathu ilandelana ukuze agcine umsebenzi umqeqetshi weHighlanders uMandla ‘Lulu’ Mpofu.
Ebika lokhu emphakathini kuliviki, uMpofu uthe ukuzwa ngentatheli ukuthi kulencwadi le elotshwe ngumgcinisihlalo uKenneth Mhlophe.
“Angazi lutho mina. Incwadi, iphi?” kubuza lumqeqetshi emangaliswa yincwadi le eyaphuma kuzulu ngeviki edluleyo anduba iBosso idlale leqembu leTriangle lapho eyanqotshwa khona 2-1.
Umdlalo wokucina, wesithathu okukhulunywa ngawo kulincwadi yilo olandelayo iHighlanders ikhangelane leHwange. Ukwehluleka ukunqoba ngempelaviki edluleyo kuqembu leMushowani, kutsho ukuba uMpofu usengatshengiswa indlela eya ekhaya.
Umqeqetshi uthe katshaywa luvalo ngoba usawuphethe umsebenzi. Uthe uzwela abadlali ubuhlungu ngoba ukwehla kweqembu kubulala ikusasa labo.
“Ngezinye izikhathi ngivele ngizwele abadlali ubuhlungu basebenza kanzima, ngikhuluma khathesi bayakhala endlini yokuntshintshela ngakho ngizibuze ukuthi lokhu kusayinguqu kumbe sokwehlule.
“Ngihlala ngibatshela ukuthi okuqakathekileyo yikusasa labo ebholeni ngakho kumele badlale ngokuzimisela kuyo yonke imidlalo,” kutsho umqeqetshi lo.
Ubunzima baleliqembu buhlukumeza labalandeli bayo abasebekholwa ukuthi kayisela mnkantsho iBosso nanko sibambana lamaqembu amancane njengeMushowani Stars.
Iqale isaqhula kodwa okwamanje ibalwa kwezikhasayo ngoba okuvele emdlalweni wayo wokucina kusolise kakhulu.
Imidlalo emibili edluleyo iveze ukuthi umqeqetshi lo engabe esehlulwa yikuvuselela iqembu alitshiyelwa nguMadinda Ndlovu ngoNhlangula.
Kumtshiya egcekeni lemibuzo ukuthi uzenelisa na ukukhipha iBosso kusimo lesi ekuso ngoba ingasadlala ngendlela eyenza ngayo izakuzithola isigijima ku Division 1.
IHighlanders ihlohle amabhola amahlanu kumidlalo elitshumi eyedlulileyo lokhu kutshengisa ukuthi kuyamehlula uMandla ukukhokhela leliqembu ngendlela yena ayethembise ukulikhokhela ngayo.
