uMthunywa
YiNtatheli kaMthunywa
ABALIMI abanengi abakhangelele ukulima ngesikhathi sebusika sebeqalisile ukuvuna ezinye izilimo ukuze kuvuleke indawo yokulima izilimo zesigaba lesi kukanti labo abasebenza ngaphansi kohlelo lweCBZ Agro-Yield Programme bazathola impahla yonke edingakalayo yokulima ingqoloyi.
UMqondisi ophezulu weZimbabwe Farmers Union (ZFU) uMnumzana Paul Zakariya ngoLwesine kuviki edluleyo ukhuthaze abalimi abafisa ukuba yingxenye yohlelo lolu ukuthi babhalise emahofisini aseduzane labo awe Agritex.
UMnu Zakariya ugcizelele ukuthi amalungiselelo asekuzinga eliphezulu njengoba abalimi abanengi behlose ukuthi benelise ukuqala ukulima mhlaka 1 Nkwenkwezi okulilanga lokulima, okuyikho osekusenza abalimi bafake ndawonye impahla yabo ukuze bagoqe ukuvuna kwesikhathi sehlobo.
UAgronomist wenkampanini yeSeedCo uNkosikazi Wendy Madzura uveze ukuthi abanye abalimi sebeqalisile ukuthenga inhlanyelo wengeza ngokuthi balemihlobo yenhlanyelo etshiyeneyo ehambelana lezabelo kunye lemvelo yendawo lapho abalimi abakhona.
Uphinde waxwayisa abalimi ukuthi bangaqalisi khathesi ukuhlanyela esithi bangenza lokhu ekupheleni kwenyanga kaMabasa endaweni lapho isigaba somqando esiqala khona masinya.
UNkkz Madzura ungezelele wathi amaviki amabili okuqala enyanga kaNkwenkwezi yiwo afanele ukuthi abalimi baqale ukulima ukuze bathole isivuno esiphezulu yikho nje abalimi bexwayiswa ukuthi balime kusukela mhlaka 1 kusiya ku 15 Nkwenkwezi.
Uthe ingqoloyi elinywa ngamalanga la iyavuthwa njalo ivunwe izulu lingakaqalisi ukuna futhi iyavika izigaba lapho imikhuhlane ebamnengi khona. Kukhangelelwe ukuthi indawo ezalinywa ingqoloyi lonyaka ibenkulu lonyaka kulandela ukuna kwezulu elinengi elabangela ukuba amadamu amanengi agcwale okuyikho okwenza kube lesiqiniseko sokuba amanzi ama-irrigation azabe ekhona.
