uMthunywa
YiNtatheli kaMthunywa
Amakhowa yisilimo esingenza umlimi azitshayele imali yakhe enhle kakhulu ngesikhathi esifanayo ulakho futhi ukulahlekelwa nxa engahlaselwa yimikhuhlane.
• Amawemusi asantambo kumbe ama-nematodes angahlasela ingxenye adle i-mycelium. Angatholakala kuma-substrates angahlanzwanga kuhle.
• Impukane ezihlasela amakhowa. Ezijayelekileyo zibizwa ngelokuthi sciarid fly. Lapha-ke ukuhlanza kubulala impethu kodwa impukane zakhona zilakho ukungena ngezikhala ezisemasefeni. Ukuhlanza phakathi laphakathi kwesilimo esitsha kanye lokuhlanza impahla esetshenziswayo kuyaphathisa ukuthi uvikele ukumemetheka kwalezi mpukane.
• Izibungu ezincinyane kakhulu zilakho ukuphila yiloba indawo ihlanziwe nxa ukuhlanza lokhu kungenziwanga okwesikhathi esifaneleyo.
• I-Bacterial blotch ngumkhuhlane ojayelekileyo. Ubonakala njengamachatha alithanga kumakhowa akho njalo amachatha la atshintsha umbala ubemnyamanyana ikhowa lakho beselisiba lokutshelelayo. Indawo elobumanzi kakhulu ikhuthaza i-bacterial blotch.
• I-Fungal dry bubble kumbe iVerticillium ngomunye umkhuhlane ojayelekileyo oyingozi kakhulu kusilimo sakho. Uqala ungamachatha aluthuli ubusucina ukhubazekisa amakhowa akho. Ungasebenzisa umuthi wohlobo lwe-fungicide yakoAgricura ukuze wenqabele lumkhuhlane.
• Kungavela isikhunta esilembala engajayelekanga efana leluhlaza, eluthuli kumbe emhlophe okutshengisela ukuthi umumo okhona ulungele ukukhula kwesikhunta kulamakhowa. Kungabe kule-ammonia enengi kakhulu kumbe i-substrate ingabe imanzi kakhulu. Usungafafaza i-calcitic limestone powder phezu kwesikhunta ukuze isikhunta singabi sisakhula, kwezinye izimo usungasebenzisa ama-fungicide.
• I-False Truffle ayivumi ukubulawa yi-pasteuris njalo lapho evela khona i-subtrate kuyabe kumele ikhitshwe impahla yokulima ihlanzwe nge-methyl bromide.
