uMthunywa
Ethel Ncube
ZILOKHU zinathisa uMaGwebu indlamanzi zeNtalale eGwanda ngamadoda ayisikhombisa lenina abavaleke ukuthambisa kanye lokuyangaphandle okwamalanga amathathu ngemva kokunatha isigodokhaya elimeni, uMthunywa ukuzwile lokhu.
Isehlakalo lesi senzakale ngeviki ephelileyo lapho amadoda abalisa uSobhuku uJewel Ncube, uThemba Maphosa, Shadreck Sibanda, Tuso Sigodo, Mpho Sibanda, Tellmore Ncube kanye lenina elilodwa uNkosazana Fana Ncube abanatha utshwala elimeni elalisemzini kaMnumzana Mpsari Ncube bavaleka ukuthambisa lokuya egangeni okwamalanga amathathu.
Okwaba yisimanga kubikwa yikuthi lanxa abemzini baba phakathi kwenkinga yokuya ngaphandle lokuchitha abemuli le abanatha utshwala lobu kabazange baphatheke kubi emzimbeni.
Ekhuluma lentatheli omunye umfakazi oqotho uveze ukuba lokhe besadidekile ngesimanga lesi.
“Kwenzakale isimanga esigabeni, lakhathesi abantu lokhe bengani abezwa kuhle emzimbeni. Kwakuphekwe utshwala belima ukuthi abantu bezobiya. Kuthe sokudliwa abanathayo bahamba bayanatha kanti sebezokhele amalahle ekhanda.
“Bathe ngemva kokukhelela amabele abayisificaminwe mibili laba behluleka ukukhululeka ukuthi bathambise lokuya ngaphandle,” kulandisa umfakazi lo.
“Abayisificaminwe mibili laba bacine bethwalelwa esibhedlela ukuze bayehlolwa njengoba basebeqede insuku ezintathu bengayi egangeni bevalekile,” kutsho umfakazi lo.
Uqhubekele phambili eveza ukuba usobhuku lokhe elele phansi engezwa kuhle.
“Utshwala ababunathayo asazi ukuthi babulani. Usobhuku yena lokhu elele phansi lalamuhla lokhu. Abanye baze bayasizwa ngosiyazi,” kuchaza umfakazi.
Iphephandaba likazulu lixhumane losobhuku uMnumzana Jewel Ncube ongomunye walabo abavaleka ukuya ngaphandle.
“Mina utshwala ngabunatha kodwa ngangivele ngingezwa kuhle ngeke ngitsho ukuthi yibo obangenza ngehluleka ukuya ngaphandle.
“Abanye ababunathayo kabazikhulumele ngingeke ngibakhulumele mina kumele batsho ukuthi bona bagula njani? Okutshelileyo lowo kakulandisele konke mina angazi lutho,” kuphetha uSobhuku uNcube
