uMthunywa
Ethel Ncube
KULAMASELA eKwekwe ahlangane lembila zithutha ngemva kokugqekeza kwenye indlu kasomabhizimusi atshontsha imibhobho lomakhalekhukhwini phakathi kwezinye impahla, babanjwa ngalelolanga abatshontsha ngalo.
Indaba le yenzakale ekupheleni komnyaka lapho umamangala ayehambe khona kukhefu lemuli yakhe watshiya unkazana osebenzayo endlini yena owasala engenelwa ngometheswacala laba abangu-6 izindlu zikhiyiwe.
Kuvezwe ukuba ometheswacala laba ababalisa uAli Awa Ali (32), Daniel Mubaiwa (43), Tafadzwa Chitsiga (24), Gilbert Madhami (27), Ernest Taruvinga (31) loGodknows Bushu (42) yibo abagqekeza endlini kamamangala batshontsha impahla ezibalisa imibhobho, indandatho kanye lomakhalekhukhwini, lamacici enziwe ngegolide.
Amapholisa athe esecwayisisa acina ebophe ababili eKwekwe lapho okwatholakala khona i-bracelet yegolide ifihlwe esambuzi. Amapholisa eHarare laweKwekwe abambana okwadala ukuba kubotshwe ometheswacala abane eHarare, kwatholakala ezinye impahla ezazitshontshiwe. Konke okwatshontshwayo kwatholakala.
uInspector Emanuel Mahoko
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba ometheswacala bazakuya emthethwandaba.
“Ukucwayisisa kusaqhubeka njalo ometheswacala bazakuya emthethwandaba nxa konke sekuphelile.
Sibonga uzulu oncedisileyo wakhulumisana lama-detectives akade ecwayisisa lelicala, siyabonga kusincedile kakhulu ukubambisana lathi njalo sithi labanye kabaqhubekele phambili ngalokho kusetshenziswana lomphakathi,” kuphetha uInsp Mahoko.
