uMthunywa
Thokozile Mbedzi
ABE-ZIMBABWE Prisons and Correctional Services sebethethe inyathelo lokufuya imbuzi zomhlobo wama-Boer ukuze baqhelise amabhizimusi abo okulima.
Ekhuluma lentatheli kaMthunywa uLivestock Section Manager kuZimbabwe Prisons uTichafa Musengi uthe sebekwelinye izinga ngokufuya imbuzi zomhlobo wama-Boar.
“NjengeZimbabwe Prisons and Correctional Services sesinanzelele ukuthi ukufuya imbuzi zomhlobo wama-Boer kulenzuzo enkulu kakhulu. Kulibhizimusi elihle hatshi okokudlala.
“Imbuzi lezi siyazinakekela ukuze lathi sithole inzuzo ethe xaxa njalo lebhizimusi lethu likhule.
“Siyabona ukuthi nxa sokumele zibe lebele ziyabe zikufanele yini lokho sibe sesizifaka ndawonye lempongo.
“Lokhu sikwenzela ukuthi sivimbe ingozi yokuthi zingaphunzi ngoba kungenzakala lokho lathi siyabe sesilahlekelwe,” kulandisa uMusengi.
Okunye esikwenzayo yikubona ukuthi nxa sesizifaka ndawonye lempongo, ezinsikazi kazila manxeba kukanti zingazala sihle sizehlukanise lezinye.
“Amazinyane siyawenzela isibaya sawo wodwa ukuze angacini esiba lemikhaza. Lokhu kuyawavikela njalo ukuthi angabanjwa yimikhuhlane etshiyeneyo.
“Kukanti lezo ezimunyisayo siyabona ukuthi siyazipha utshani ukuze zithole izakhi zomzimba zenelise ukwehlisa kakhulu.
“Kuthi amazinyane ayabe ezelwe engamaphahla wona siyawadingela uchago ukuze athole ukudla okweneleyo ngoba sikubhizimusi lapha,” kuchaza uMusengi.
Imbuzi zohlobo lwama-Boer zithengiswa ngemali eqala kuUS$150 kusiya ku US$500.
“Ngikhuthaza labo abalesifiso sokufuya ukuthi bangene kubhizimusi le ngoba ilenzuzo kakhulu njalo iyaphangisa ukunika ofuyileyo inzuzo.
“Okunye okuhle ngembuzi lezi yikuthi zidla utshani esikuthi ngama-free range. Inyama yazo iqondile njalo ilungele uzulu ngoba kayiphambanisi impilakahle yabo,” kuphetha uMnu Musengi.
