uMthunywa
Bongani Ndlovu
ABALIMI bakhuthazwa ukulima ama-avocado ngoba enika umlimi inzuzo ethe xaxa njalo engadli kakhulu esikhwameni somlimi ukuze athole inzuzo.
Ekhuluma loMthunywa uMnumzana Brendon Siziba ongumlimi uthe ukulima ama-avocado yindlela enhle yokwenza imali ngoba kawalamsebenzi omnengi ukuze uwalime, ayavuma ukulinywa endaweni ezinengi njalo kadingi imali enengi.
“Ama-avocado yizithelo ezingalimeka kumumo yomkhathi etshiyeneyo ngakho kuyinto enhle ngoba ayalimeka emkhathini esiphila kuwo eZimbabwe. Isithelo lesi sidinga ukulinywa endaweni elesikhudumezi esiphakathi kwe-17°C kusiya ku-27°C ukuze sikhule kuhle.
“Ukuze umlimi athole isithelo esihle kumele ananzelele umhlabathi lapho azalima khona ama-avocado akhe, umhlabathi obomvu yiwo ovuma kakhulu isithelo lesi njalo ubengumhlabathi ongavimbeli ukuhamba kwamanzi, ovundileyo, nxa ungavundanga umlimi angasebenzisa ifethalayiza ekungezeleleni umvundiso emhlabathini,” kuchaza uMnu Siziba.
Ugcizelele ngokuthi isithelo lesi asidingi mali enengi ekusinakekeleni.
“Isithelo lesi asidli kakhulu esikhwameni somlimi ngoba singahlaselwa kakhulu yimikhuhlane ngakho ukusilondoloza kwaso akudingi mali enengi. Umsebenzi omnengi ukhona ngemva kweminyaka lapho okuyabe kuhlanyelwa izihlahla ezintsha ngoba zilakho ukukhula zize zibe yi-60 feet,” kuchaza uMnu Siziba.
“Abalimi balakho ukuthola inzuzo engaphezulu ngoba ama-avocado elomkambo kusukela phakathi elizweni langaphandle kwelizwe okuyinto engalethela abalimi imali enengi njalo athuthukise umnotho welizwe,” kuphetha uMnu Siziba.
