uMthunywa
Ethel Ncube
INKOMO zomhlobo wama-Brahman zinkomo ezilohlonzi lwaphezulu ezinganika umlimi imali kukanti njalo akudingi imali enengi ukuthi aqalise ukuzifuya.
Omunye umfuyi wenkomo zomhlobo lwama-Brahman oseleminyaka engu-16 esenza lokhu, esigabeni seMzingwane obekumbukiso wezifuyo oqhutshwe kumbukiso osanda kwedlula oweZimbabwe International Trade Fair uMnumzana Jairos Mahlangu uveze ukuthi kulula ukufuya inkomo lezi.
“I-Brahman ngumhlobo wenkomo omuhle futhi ezilula ukufuya. Inkomo lezi kusukela kunyanga ezingu-24 ziyenelisa ukukunika ithole. Ithole lakhona kuyabe kumele limunye inyanga ezidlula eziyisithupha.
Zimbabwe International Trade Fair
“Inkomo lezi kazifuni kusengwa. Isizatho salokho yikuthi inkomo yakhona ibakwazi ukuthi kumele yehlise uchago olunganani lwethole layo.
“Nxa kungenzakala ukuthi uyisenge iyabe isisehlisa uchago lwethole kanye lolomlimi lokusenga kodwa kungenzakala ukuthi uqede insuku ungasengi lolochago ithole lisuka lihudiswe yikumunya lolochago olusalayo. Nxa ithole lingavele liqalise ukuhuda lihle libe sengozini futhi yokuhlaselwa yimikhuhlane njalo kungenzakala ukuthi licine lisifa umlimi alahlekelwe yinzuzo yakhe,” kulandisa uMnu Mahlangu.
Uqhubekele phambili eveza ukuba ukufuya ama-Brahman yinotho enhle.
“Ngikhuthaza abalimi ukuba ama-Brahman yiphurojekithi enhle kakhulu abangangena kuyo ngoba nxa uwathengisa aqalisela kuUS$1000.
“Inkomo lezi kazidedesi, okudingakalayo nje yikuba kumele ithole amanzi. Ukudla ziyazidlela nje egangeni azidingi kuthengelwa kokuphela ukudla,” kuphetha uMnu Mahlangu.
