uMthunywa
Langelihle Moyo
AKUBIZWA ozwayo endaweni ezehlukeneyo zakoBulawayo lapho okuqhutshwa khona imcimbi ehlukeneyo yeNtwasa Arts Festival kuze kube nguMgqibelo mhlaka 30 Mpandula.
Imcimbi yeNtwasa Arts Festival iqhutshwa ngaphansi kwendikimba ethi “Imagine it, Experience it” njalo izaphathwa endaweni ezibalisa eBulawayo Theatre, Bulawayo Public Library laseNational Art Gallery in Bulawayo.
Umcimbi weNtwasa uvulwe ngemigido etshiyeneyo kunye lomdlalo obizwa ngokuthi Amagrootman owabhalwa nguSolly Hlabirwa Malaka osuke wadlalwa kweleSouth Africa kunye lakhonapha eHarare.
Umdlalo lo ufundisa abesilisa ngemvukuzane yabesilisa kanye lokuba sengozini ezehlukeneyo.
Ekhuluma lentatheli kaMthunywa uMqondisi weNtwasa Arts Festival uRaisedon Baya uchaze ngalokhu uzulu okumele akukhangelelwe kumcimbi yalonyaka.
“Mhlaka 28 ngoLwesine, asibuyeni ngobunengi sizokuzwa umculo omnandi osuka kuVusa-Mkhaya, eNational Art Gallery in Bulawayo.
“Besokusithi ngoLwesihlanu uJason Mphepho lo Farirai Borwere bazadlala umdlalo obizwa ngokuthi yi-Beautiful Man owaqondiswa nguTafadzwa Bob Mutumbi. Lowu umdlalo uzadlalwa ngehola lesithupha ntambama eBulawayo Theatre.
“Ngosuku lokucina ngoMgqibelo kuzaba lomdlalo obizwa ngokuthi yi- 3Sum ozayenzelwa eBulawayo Theatre ngehola lesithupha ntambama. Abalingiswa bomdlalo lo bagoqela uMemory Kumbota, Lady Tshwane, Agnes Ncube, Mzingaye Ngwabi lo Anita Moyo,” kulandisa uBaya.
“Umcimbi ozavala iFestival yi-Intwasa Comedy, okungumcimbi wabomahlekisa ozabe useBulawayo Public Library, lapho kuzabe kuloNtando Van Moyo owake wathola isicoco kwezabomahlekisa, uQ Dube, uChichie, Blackrose labanye abanengi. Bonke bazabe bebulala abantu ngembambo,” kuphetha uBaya.
