uMthunywa
Ethel Ncube
IQEMBU laMakholwa eNkosi lithi uyavutha umculo walo wezokholo nanko seliphinde laphekela abalandeli balo idlalade elitsha ngemva komnyaka owodwa.
Leliqembu elathola isicoco ngengoma yalo ethi Impilo yalamhlanje, libunjwe nguDelight Ncube ngomnyaka ka2018 njalo lilamalunga ayisithupha selilamadlalade amabili.
UNcube utshele leli phephandaba ukuthi bakhiphe i-albhamu yabo entsha ekupheleni kwenyanga kaNcwabakazi ethi, “Ulihawu lami Baba”.
“Lonyaka ngumnyaka wempumelelo kuqembu lethu. Sithole isicoco seGospel Song of the Year ngengoma yethu ethi Impilo yalamhlanje ngenyanga kaNhlangula lonyaka. Ingoma yethu ibitshisa emsakazweni etshiyeneyo.
Idlalade lethu elitsha lilengoma ezingu-10 lilesihloko esithi, Ulihawu lami Baba.
“Idlalade lethu elitsha lilengoma ezilitshumi ezithi Ulihawu lami Baba, Amagalatiya, Impilo Yanamhlanje, Umhlaba Wonakele, Uyamazi uJesu Yini?, Ikhono Lami, Umkhumbi, Sabela Uyabizwa, Isiphambano, Security Bodyguard,” kubika uNcube.
Uqhubekele phambili eveza ukuba umculo wabo uyisibhedlela somoya esisiza abanengi phakathi kwenhlupho ababhekane lazo.
“Umculo siyawuqhuba sisiyaphambili asimi njalo okwethu yikuqhubeka sihlabele siduduza, silaya lokwelapha uzulu ngengoma zethu.
“Kungakho sithi kubalandeli bethu nanti idlalade seliphumile ngelenu sondelani lizitholele idlalade lenu lizikholisele lingesabeli khatshana,” kuphetha uNcube.
