uMthunywa
NGENXA yokuthukuthela ngokutshontshelwa imbuzi zakhe ezingamatshumi amathathu uMnumzana Nonki Lodi (58) unakane ukuthi ayewadinga lamasela abesehlukuluze izakhamizi ezinengi eLeewfontein indawo eseLimpopo kweleSouth Africa wazifica endlini yenkonzo.
Isimanga yikuba ekudingeni imbuzi zakhe uMnu Lodi uzithole zikwenye indlu esetshenziswa njengendlu yenkonzo.
UMnu Lodi uthe imbuzi zakhe zatshontshwa kumaviki amabili edluleyo ngesikhathi umfana oyelusa imbuzi zakhe engekho.
UMnu Lodi uthe wanakana ukuyadinga imbuzi zakhe okuyikho okwabangela ukuthi athole ezingu-12 aphinde njalo abamba amasela amabili.
“Ukutshontshwa kwembuzi zami kwangizwisa ubuhlungu impela kungakho-ke ngadinga abafana sangena indlela sizidinga.
“Sabamba amasela amabili okuyiwo asitshengisa lapho ayefihle khona imbuzi ayezitshontsha yikho nje ngathola ezami ezingu-12. Amasela la ayefihle imbuzi kusakhiwo selinye ibandla okuyisimanga kithi ukuthi kambe abantu bangafihla njani izifuyo abazebileyo echurch,” nguMnu Lodi lo.
UMnu Lodi uthe abanikazi bendlu baveza ukuthi ezinye imbuzi zakhe zazithengiselwe enye ondoda ngemali engange 3500 randi.
Amasela la kubikwa avez lapho ababengathola khona omunye wabo lakanye laye wabanjwa.
UMnu Lodi olokhe edinga ezinye imbuzi zakhe ezingu-18 uthe indubo zakhe zilokhu zisanda nanko phela ubelesivumelwano lenye inhlanganiso esokuthi uzabanikeza imbuzi ezingu-60 kodwa ngenxa yokuthi utshontshelwe imbuzi kuzakubanzima ukuthi akwenze lokhu okutsho ukuthi inhlanganiso le ayiqambe ngebizo izamhlawulisa.
Umnikazi wenkonzo walile ukukhuluma labamaphephandaba.
Isikhulumi samapholisa uConstable Boitumelo uvumile ukuthi kulamasela abotshwe ngemva kokubanjwa ngenye indoda njalo kuvulwe icala lobusela.
Uthe abasolwa abale minyeke ethi 31, 28 le22 bamiswe phambi kukamantshi eMotetema kuyonale iviki.
Oyedwa kubikwa uphiwe ibheyili ye 1000 randi abanye bakhe babili bancitshwa ibheyili njalo bakhangelelwe ukuthi baphenduke emthethwandaba ngoLwesine. — Ubulembu
