uMthunywa
KULENDODA eleminyaka engu-27 eyazakala kakhulu ngokugcina inkalakatha yenyoka emzini wayo eGoo-Lobekwe iwadi eseKanye, eBotswana. Abantu abedlulayo bangayibona linyoka bagijima bayebikela amapholisa kodwa lindoda kayibotshwa. UPhemo Keakaetswe uyinyanga eyaziwayo kulindawo. Uhlala endlini elamakamelo emabili aceciswe ngamalembu abomvu andise ukusetshenziswa ngosiyazi.
Ngempelaviki intatheli isukume yayavakatshela linyanga eyesatshwa ngabantu kakhulu ukuze izwe ukuba ikwenza kanjani ukuhlala ndawonye lenkalakatha yenyoka. Iguma ahlala kilo alilihle ngitsho lakancane, kulamakamelo amabili okutsho ukuthi elinye ngelakhe kukanti elinye ngelomhambaphansi wakhe.
Ukubakhona kwalindoda esigabeni kuletha ukwesaba phakathi kwabantu kodwa amapholisa angatshelwa ngalokhu kukhanya lawo ayesaba ukuthi alungisise udaba lolu.
Intatheli ithe ingena egumeni lika Keakaetswe imangele ihlangana lamanina amanengi, amanye engena amanye ephuma kuthi amanye elinde ukungena abone linyanga eyesabekayo.
Intatheli ithe ingena endlini yahlangabezwa yintuthu isuka kumithi etshiyeneyo etshiswayo lapho. Kugcwele imithi kulelikamelo. Emdulini kulengiswe iyunifomu yesiziyoni eluhlaza. UKeakaetswe uvumile ukuba ulenyoka asehlale layo okweminyaka engu-11. Uthe inyoka le yayinde okwemitha elilodwa ngesikhathi eqala ukuyithola kodwa khathesi isingamamitha amathathu.
“Ngathatha inyoka le eShakawe ngemva kokuyibona ephutsheni. Inyoka le yayiyisipho esivela kumadlozi angakithi.
“Okhokho bami bonke babezinyanga njalo bedabuka eShakawe,” utsho njalo.
Uqhubeke phambili wathi inyoka yiyo emsiza ukwelapha abantu.
“Abantwabami bayijwayele linyoka njalo bakhululekile kakhulu nxa belayo,” utsho njalo.
Uqhubekele phambili wathi uyenelisa ukwelapha umkhuhlane wetshukela, izathuthwane, inyawo ezibuhlungu kanye leminye imikhuhlane eminengi etshiyeneyo
Uthe sewake wahlala ebhalwini kanye lasemanzini, ungumkhokheli webandla njalo uthi kadli nyama.
“Ngingadla inyama ngingazithola sengibulala abantu okuyinto angayifuniyo.”
Abomthetho kubikwa sebake bazama ukuzathatha inyoka le kodwa babaleka ngoba isibahlasela.
Omkhulu eSejelo Police station uSuperintendent Vincent Pitsetseele uthe udaba lwenyoka lusachwayisiwa.
Intatheli azizange zikwazi ukuthi ziqondisise ukuthi inyoka le yinyoka mhlobo bani sibili kodwa bezilokhu zisizwa imsindo engajayelekanga esuka ekamelweni eliseceleni. Inyoka ibilapho njalo inyanga le yalile ukuveza ukuba kungani abesifazane abendileyo beyibo abafika kiyo kakhulu bedinga usizo.-Ubulembu
