uMthunywa
Thokozile Mbedzi
ZILOKHU zinkemile izakhamizi zesigabeni seFort Rixon ngemva kokuba amadoda ayisithupha ethelele enye indoda ayibhaxabula ngokhuni kunye lomphini wehloka ayibulala ngeviki ephelileyo ngesizatho esingasatholakalanga.
Kubikwa uAbility Dube oleminyaka engu-21 lomunye oleminyaka engu-16, esingeke sachaza igama lakhe ngoba engaphansi kweminyaka engu-18, uNkosana Dube oleminyaka engu-21, uNhlanhla Dube oleminyaka engu-19, uMgcini Nyoni oleminyaka engu-19 loleminyaka engu-17 laye okugodlwe ibizo lakhe, kubikwa bahlasela uRichard Moyo oleminyaka engu-22 bebanga isizatho esingaziwayo okwabangela ukuba avuke edlule emhlabeni ngosuku olulandelayo.
Ekhuluma lentatheli kaMthunywa, uInspector Loveness Mangena oyisikhulumi samapholisa esabelweni seMatabeleland South uthe kulamadoda kayisithupha athelele enye indoda ayihlasela yedlula emhlabeni.
“Kulamadoda ayisithupha abambane athelela enye kodwa salokho obekubangwa kasisasitholanga. Kucatshangelwa ukuba uRichard wayezihlalele eyeme umduli wesitolo elomunye ubaba kwathutsha uBongani Moyo wafika wadobha ikhuba waleyamisa eceleni komduli waphinda njalo wadobha ukhuni wasetshaya ngalo uRichard.
“URichard esetshaywe ekhanda wawela phansi abanye bakhe bathutsha begijima baqala ukumthelela omunye wakhupha ihloka wasala ephethe umphini wamtshaya ngawo futhi.
“Abayisithupha laba bamtshaya walimala kakhulu njalo kazange asiwe esibhedlela wavuka ngosuku olulandelayo edlule emhlabeni.
“Kucelwa labo abangaba lolwazi lwalapho abayisithupha laba abakhona abikele amapholisa aseduzane laye ukuze babotshwe.
“Amapholisa axwayisa uzulu ukuba nxa sokuthe kwaba lenxabano kazixazulule kuhle ngendlela elobuntu ngoba abantu kumele bahloniphe impilo hatshi ukulwa,” kuphetha ulnsp Mangena.
