uMthunywa
Buhlebenkosi Gaule
ABATSHA bakoBulawayo sebethole ithuba lokuyabukisa imisebenzi yabo yezandla kumbukiso weZimbabwe International Trade Fair (ZITF) kugatsha lweYouth, Indigenisation and Economic Empowerment ngenhloso yokuthuthukisa umsebenzi wabo.
Umkhosi weZITF uqala mhlaka 26 kusiya ku30 Mabasa.
Ugatsha lolu lunxuse bonke abatsha bakoBulawayo ukuthi bazobukisa imsebenzi yabo yezandla egoqela eyokuthunga, ukwenza izicathulo, abalungisa impahla yokucecisa yezindlini lokunye okutshiyeneyo.
Iphephandaba likazulu likhulume loNkosazana Siphiwe Moyo onguye uYouth Development Officer ochaze okuba ugatsha lwakhe lwakoBulawayo lwandise ukuba lamathuba afana laleli kanye loba kabili ngomnyaka ukuze abatsha babukise imisebenzi yabo yezandla.
UNkszn Moyo uthe umcimbi abawubiza ngokuthi yi-mini expo uvulekile kuye wonke umuntu omutsha olesipho sokuba alungise kumbe enze izinto ezingathandwa ngabantu.
“I-mini expo ngeyabatsha bonke abalezipho ezitshiyeneyo njalo abaphila ngazo ezifana lokuthunga, ukubaza lokunye okubenza bathole imali yokuziphilisa,” kutsho uNkszn Moyo.
“Uhlelo lolu lwamukela abatsha bonke njalo abafuna ukubhalisa ukuze babeyinxenye yogatsha lolu kubhaliswa kungela mali ebhadalwayo. Labo abazabonakala belempahla enhle bazakuyabukisa eZITF njalo ugatsha lwethu yilo oluzabhadala indleko zakhona,” kuchasisa Nkszn Moyo.
UMthunywa wenelise ukuxoxisana lomunye wamantombazana asekhethwe ukuthi ayebukisa eZITF uMary Chatikobo.
“Ngiyathokoza ngethuba engilitholiswe lugatsha lwentsha, lokhu kwenza ngiziqhenye ngoba kutshengisa ukuthi bakhona abathakazelela umsebenzi wami njalo ngilethemba lokuthi uzathakazelelwa ngabanengi njalo kumbukiso weZITF,” kutsho uChatikobo.
UChrispen Matsika ongomunye njalo wabatsha olungisa amangqongqo okuceca uthe banengi abantu bakwamanye amazwe abathanda umsebenzi wakhe njalo uyajabula ngoba kumbukiso weZITF bazabe bebanengi abazobona impahla ebukiswayo.
UNkszn Moyo uphethe ngokukhuthaza intsha yonke ukuba ivuselele iziphiwo zayo ukuze babengabantu abaziqhatshayo bengameleli ukudinga imisebenzi.
