uMthunywa
Kujwayelekile ukuzwa umuntu ongumama efunga egomela encitsha uyise wabantwana ilungelo lokuthi abone abantwana ngezizatho ezinengi.
Abanye uzwa bethi wayengangitshelanga ukuthi ulonkosikazi, ethi umuntu esezithwele uzwe khona umuntu owawuthembisana laye izulu lomhlaba lisidla konke okumnandi ekwenzela noma yini ongabe uyayifuna esephenduka inkunzi yebhubesi ekutshela ukuthi yena ungusekazibani.
Abanye njalo ngabathi emveni kokwalana indoda ifulathele, ihambe inyamalale asale umama ebaphandela abantwana baze bakhule, engazi umuntu ukuthi badlani, bembathani bafunda ngemali kabani bathi sebekhulile bengasaphumeli njalo bengasatshukwa, abuye umuntu esefuna ukubona abantwabakhe, yikho lapho engake ngezwa omunye umama etshela idombo elalithunywe ukuthi libuye lokuzimpahla kwabantwana ukuthi abantwana uzababona ezulwini.
Lempahla zakhona wazithatha wazidabudabula waziphosela esifuleni sengcekeza sedolobheni lakoBulawayo uMazayi, ledombo lahle layifunda ivaliwe ukuthi lapha inyathi idlelwe inkonyane ngamaganyane.
Phela wayezondile lumama efunga egomela ethi noma kanjani ngeke axole ngoba uyise wabantwana wayemdanisile njalo kwenza waxabana lomdeni wakhe ngoba usumsola ukuthi wayengakhomba indoda yomnikazi wona amadoda egcwele ilizwe lonke.
Lindoda yayimtshela amanga ithi bazatshada kanti yona iyazi ukuthi ilonkosikazi wayo emthandayo, ngapha nje lumama yayimenza isigcabha into yokwesulela izicathulo nxa zilodaka.
Labantwana wayebatshumayeza ivangeli elibi ngoyise ukuze labo bangalokothi lokuthi kwelinye ilanga bangafisa ukumbona ngoba indlela abebefunzwe ngayo ngobubi bukayise ingancinta uJudasi Skario owathengisa uJesu.
Umlobi ungamthinta ku: 0714355641
Ayixabene
