uMthunywa
Langelihle Moyo
UDJ Mzoe osedume ngokuqoqa imicimbi yokuzalwa yabantu abazelwe ngenyanga ezehlukeneyo, usebuye wenza adume ngakho nanko ukhangelelwe ukubamba umcimbi wekhefu lePhasika obizwa ngokuthi yi-Easter April Shellings Special ozakwenzelwa eSports 747.
Kumcimbi lo kukhangelelwe ukuthi labo abazalwa ngenyanga kaMabasa labo bathole ukuthakazelela inyanga yabo yokuzalwa.
UDJ Mzoe ogama lakhe lokuzalwa nguSibanengi Mzoetshe Ndebele uthi ufuna insuku zonke zePhasika abantu baziqede bephakathi kwenjabulo.
Ekhuluma lentatheli kaMthunywa uDj Mzoe uthe umcimbi lowu ubizwa ngokuthi Easter April Shellings Special. Uthe umcimbi lo uzadonsa insuku ezine zePhasika.
“Umcimbi lo umkhulu, uzakuba seSports 747 khonapha koBulawayo. Nginxusa bonke abantwana labazelwe ngoMabasa ukuthi ababuye bezokholisa. Konke okuthandwa ngabantwana kuyabe kukhona.
“Umcimbi lo uzaqhutshwa insuku ezine zePhasika, ngakho-ke ngithi kumzali wonke asiletheni abantwana bezojabula ngekhefu lani lithole ukubethwa ngumoya okhekhe bengekho beyezikholisela labontanga babo,” kulandisa uDj Mzoe.
Ucine ngokuchaza ngokumele kukhangelelwe ngabantwana kumcimbi we-Easter Shellings/ Kids Carnival.
“Kuzabe kulaboDj abanengi abazabe bentshintshana ukuvuthisa inkundla bedlala umculo walezinsuku othandwa ngabantwana. Besokusithi kwezemidlalo kuzabe kulezinto ezigoqela i-jumping castle, trampoline, hungry hippo game, quad bike, clown face painting, kids car ride kanye lokudla kuyabe kukunengi kungaduli futhi. Ngakho-ke asilungiseleleni silethe abantwana bazokholisa kuKids Carnival,” kuphetha uDj Mzoe.
