uMthunywa
Ngesikhathi i-Generations: The Legacy ilungiselela ukuqala kwesizini yayo entsha ngoMvulo, iyaqhubeka ngokumiswa kabi yizinhlelo ze-e.tv ngokuba ngumdlalo wesibili ukubukelwa kakhulu njengoba ziphinde zayehlula inyanga yesibili kulandelana.
I-Generations, ekhonjiswa ngo-8 ebusuku phakathi kweviki kuSABC1, ike yaba yiwo umdlalo oqengqeleza phambili ngesibalo sababukeli eNingizimu Afrika okweminyaka.
Izinto zijike sekufika Uzalo oludlala kuso lesi sitetshi ngemva kwayo, kwaba yilo oluhleli esicongweni.
Izibalo zango-Mfumfu ezitshicilelwe kuBroadcast Research Council of South Africa, zikhomba ukuthi Uzalo lulababukeli abangu-6 177 811.
Lulandelwa yi-Scandal! esilababukeli abangu-5 604 108 le-House of Zwide elabangu-5 115 995.
Lokhu kubeka i-Generations endaweni yesine nge-4 786 201.
NgoMpandula, khona Uzalo lwalulababukeli abangu-5 139 747, i-Scandal! silabangu-4 420 503, i-House of Zwide ilabangu-4 142 390 bese kuthi i-Generations ilandele ngo-4 140 551.
Lango-Agasti, yayisendaweni yesine ilandela Uzalo, Scandal! le Skeem Saam.
Muva nje, i-Generations isanda kubuyisa izilomo zayo zakudala uConnie Ferguson onguKarabo Moroka loRapulana Seiphemo olingisa indawo kaTau. Kujoyine lomunye umlingisi odumileyo u-Aubrey Poo onguKhumo.
NgoMvulo, kuzaqala isizini entsha ye-Generations futhi sekuqinisekisiwe ukuthi yibaphi abalingisi abahambayo.
Abatshiyayo ngoBuntu Petse odlala indawo kaNontle, Karabo Maseko onguLuyolo, Zizipho Buti onguTracy loRebaone Kgosimore onguPaul.
“Sizobakhumbula futhi sibafisela konke okuhle kwabazakwenza. Abalingiswa oNontle, Luyolo, Tracy loPaul bazaqhubeka lokubonakala kuze kube yisekupheleni kukaLwezi, lapho izindawo zabo ziphela ngendlela ezomangaza abanengi,” kutsho abezokuxhumana ezitetshini zethelevishini kuSABC. —Isolezwe
