uMthunywa
Langelihle Moyo
INHlANGANISO ye-Agricultural Advisory and Rural Services isixwayise abalimi ukuthi baqale ukulungiselela ukulima.
Oyingcitshi kwezokulima lezokufuya kunhlanganiso le uMnumzana Dumisani Mbikwa Nyoni uthe abalimi kunengi abangakwenza belungiselela isikhathi sokulima.
“Okwakuqala sikhangelele ukuthi wonke umlimi abeseqalisile ukulungiselela amasimu akhe konke lokuvuselela intango, labo abalemigelo emasimini kumele bayigebhe beyitshonisa.
“Ekutshiseni amabibi asinanzeleleni ukuthi asitshiyi imililo ibhebha kungela okhangeleyo ikakhulu ebusuku ngoba kungasala kuvuka umoya kumbe izivungazane umlilo ubusumemetheka utshise intango lamasimu abanye abantu.
“Imililo le icina imemetheka ize itshise amadlelo ezifuyo, itshise nje leganga lonke lezihlahla ezivikela ezincedayo nxa kubuya umoya omkhulu. Ngiyalikhumbuza njalo ukuthi asithengeni inhlanyelo yethu kuseselesikhathi, singameleli ukuthi izulu lize line ngoba inhlanyelo izakube isidula wonke umuntu uyabe seyifuna”, kulandisa uMnu Nyoni.
Ubuye wakhuluma ngokungenziwa ngalesi isikhathi sesikhangelele ukuna kwezulu.
“Nxa izulu selizakuna sikhangelele ukuthi abalimi labafuyileyo balungise indawo zabo zokukhongozela amanzi ezifuyo. Asikhupheni udaka emadamu letshebetshebe ukwenzela ukuthi nxa izulu selisina amanzi ageleze angene phakathi abemanengi, okunye njalo sigebhe imigelo ezancedisa ukugcina amanzi emasimini, lokhu kuyancedisa izilimo ukuthi zingatshi,” kutsho uMnu Nyoni.
Uphethe ngokuthi kuqakathekile ukuthi abalimi balondoloze imvelo njalo kuqakathekile ukulungiselela ukulima ngoba umlimi yikho lapho ananzelela khona ukuthi kuyini okusilelayo kumalungiselelo akhe.
