uMthunywa
YiNtatheli kaMthunywa
ABALIMI bemadolobheni bakhala ngokwanda kwamasela atshontsha umumbu wabo okulakho ukuphambanisa isivuno sabo kunye lokuvikeleka kokutholakala kokudla.
Abalimi endaweni ezehlukeneyo zelizwe bakhangelele isivuno esihle lonyaka kulandela ukuna kwezulu kusigaba lesi.
Ukuze zingabhekani lobunzima bokuswela ukudla izakhamizi ezinengi sezilima emadolobheni. Lanxa abalimi laba belesilimo esihle kakhulu kodwa amasela abathwalele ubhulo.
Omunye umlimi weMakokoba olima koGreespan uNkosazana Otilia Ncube uthe amasela asesenza bavune isilimo sabo singakomisisi.
“Bengilime indawo enkulu sibili njalo ngathola inhlanyelo kunye lomvundiso kaHulumende kodwa isivuno sami sesiphose saphelela emasimini ngoba amasela akhona kadlali sidla sonke.
“Okubuhlungu njalo yikuthi bakhetha umumbu omkhulu okuyiwo oyabe ufuna ukuwutshiya ukuze uhulule ube ngowempuphu,” kuchasisa uNkszn Ncube.
UNkszn Ncube uthe omunye umumbu othengiswa edolobheni ngotshontshwa emasimini abo.
Esinye isakhamuzi selokitshini leMakhandeni esithande ukwaziwa ngokuthi nguMaMo uthe amasela amanengi atshontsha ebusuku.
“Abanye batshontsha ngenxa yendlala kukanti abanye bafuna nje ukwenza imali ngokuthengisa umumbu omanzi.
“Ngatshontshelwa iziqu ezingu-29 okokuqala kuhlandla lesibili batshontsha engu-23 mhlawumbe babefuna ukuzidlela loba ukuthengisa,” kuphetha uMaMo.
