uMthunywa
Buhlebenkosi Gaule
UGATSHA lweInformation Communication Technology (ICT) solukhuthaze abalimi ukuthi basebenzise imitshina yakulezinsuku efana lamakhompuyutha ukuze bathole ulwazi kwezokulima baphinde njalo bathole isivuno esihle.
Umqeqetshi omkhulu kwezethekhinoloji lezokuhambisa kombiko kugatsha lolu uMnumzana Maxwell Nkomazana uchaze ukuba abalimi balakho ukuthola isivuno esingcono nxa bangadinga ulwazi endaweni ezitshiyeneyo.
Uthe zinengi indawo abangathola kizo ulwazi lolu oludingakalayo kuye wonke umlimi kulezinsuku okutsho ukuthi bangavakatshela inhlanganiso ezibona ngezokulima baxoxisane labalimisi kumeb badinge ulwazi kumakhompuyutha.
“Abalimi bakulezinsuku balenhlanhla kakhulu ngoba zinengi indawo abangathola kizo ulwazi lwezokulima.
Kulezinsuku kulemitshina etshiyeneyo njalo kulendlela ezintsha zokulima okutsho ukuthi abalimi bangaba lamathuba okuphumelela ekulimeni kwabo ngasikhathi sonke ngoba ulwazi lunengi njalo itechnology yakhona ikhona.
“Ugatsha lwethu olwe ICT luzimisele ukusebenzelana labalimi ukuze bathole ulwazi olungabaphathisa lapho belima.
Ulwazi lolu lungabe luphathelane lokuthi bengagcina njani amakhuba leminye imitshina esthiyeneyo yokulima lokuthi bangasebenzisa yiphi inhlanyelo kuziphi indawo,” nguMnu Nkomazana lo.
Uthe imibuzo yonke le umlimi ulakho ukuyibuza ezihlalele emzini wakhe akudingakali ukuthi asukume angene indlela ehamba umango omude ngoba amakhompuyutha akhona kulezinsuku njalo ubulembu bugcwele ulwazi olungapheliyo ngezihloko ezitshiyeneyo.
“Abalimi abazimiseleyo balakho ukuthola isivuno esingcono nxa bengafunda ukusebenzisa itechnology njengalokho okwenziwa ngabalimi bakwamanye amazwe.
Lokhu kungenziwa ngabalimi bakuleli kungakhathalekile ukuthi ngabemadolobheni kumbe emaphandleni ngoba bangasebenzisa omakhalekhukhwini ukuze bangene kubulembu.
“Kulabo asebekhulile bangacela abantwababo kumbe abazukulu ukuthi babaphathise ukukwenza lokhu nanko phela intsha yakulezinsuku akula lutho engayaziyo ngezamakhompuyutaha ubulembu letechnology,” nguMnu Nkomazana lo.
Wengezelele wathi abanye abalimi abahlala endaweni ezinjenge sigabeni seMguza lapho okungela balimisi abasebenza behlala khona kumqoka ukuthi bafunde ukusebenzisa ubulembu.
UMnu Nkomazana uphethe ngokucebisa abalimi ukuba bayenelisa ukuncedisa ilizwe ukuthola imali evela kwamanye amazwe nxa indlela zokulima kwabalimi beZimbabwe zingathuthukiswa yitechnology.
