uMthunywa
Johas Moyo
ABENHLANGANISO ebona ngezifuyo abeLivestock Production Development sebekhuthaze abalimi ukuthi baqalise amabhizimusi okufuya inkukhu zemakhaya ngoba zisanda masinya njalo zithandwa ngabantu abanengi.
UMnumzana Mike Nemashakwe onguLivestock Officer esabelweni seMatabeleland North ubikele iphephandaba likazulu ukuthi abalimi balakho ukuzitholela inzuzo enhle nxa bengafuya inkukhu ezibizwa ngokuthi yi-boschveld.
Kubikwa inkukhu lezi kazihlaselwa yimikhuhlane lula njalo zilenyama emnandi okwenza kubelula ukuzithengisa.
UMnu Nemashakwe uthe kubalulekile ukuthi babe yingxenye yamaqembu abalimi enza inhlelo zokufuya ezizabathuthukisa ikakhulu ukufuya inkukhu zesintu ngoba bebalutshwana abazifuyileyo.
“Sikhuthaza abalimi ukuthi babumbe amaqembu babe babili kumbe bathathu ukuze benelise ukuqhuba kuhle uhlelo lolu asebeqophe ukulenza.
“Kuhle njalo ukuthi baqale bafundele ukufuya inkukhu lezi ukuze babe lolwazi olujulileyo ngokumele bakwenze ngesikhathi sebeqhuba ibhizimusi yabo,” kutsho uMnu Nemashakwe.
Kubikwa umhlobo wenkukhu lo obizwa ngokuthi yi-boschveld utholakala kakhulu esabelweni seMatabeleland ngoba kuhlangene umhlobo wenkukhu zaseZambia kanye lezakuleli.
“Umhlobo wenkukhu zemakhaya we-boschveld ongene lonyaka ngoZibandlela muhle kakhulu ngoba uyalwisana lemikhuhlane njalo ngemva kwamaviki amabili umlimi ulakho ukuthi abone ukuba ngensikazi kumbe ngenduna.
“Ngesikhathi umhlobo wenkukhu zakhona ukhula lamaqanda ayabe ekhula okutsho ukuthi ziyaphangisa ukubekela njalo ziyanda ngokuphangisa okwenza kube yibhizimusi enhle kulabo abafisa ukusungula amabhizimusi kumbe abafuna ukuthuthuka kanye lokuziphilisa ngokufuya,” kutsho uMnu Nemashakwe.
Uqhubekele phambili esithi inkukhu lezi kazihluphi ngitsho ekudleni ngoba zizidlela njengezemakhaya njalo ziyenelisa lokuzidingela ukudle.
“Inkukhu lezi ziyenelisa ukuzidingela zodwa ukudla okutholakala eduze okungafana lokuqhwaya izibungu esibayeni kumbe yiloba yikuphi ezikuholelwayo,” kutsho uMnu Nemashakwe.
Uphethe ngokuthi abalimi balakho ukuthi bazihlabe amajekiseni kanye lokuzipha imithi yesintu efana lechena ukuze zingahlaselwa yinyongo kanye lokubulala izibungwana zesiswini.
