uMthunywa
Langelihle Moyo
INHLANGANISO ye-Agritex isikhuthaze abalimi lezakhamuzi ukuthi bancedisane ekuphunguleni izinga lokumemetheka kwemlilo yendle ngoba ibhidliza imvelo yethu.
UMqondisi kwezokulima lezokufuya kunhlanganiso ye-Agritex esabelweni seMatabeleland North, uMnumzana Dumisani Mbikwa Nyoni, ukhuthaze izakhamizi zesabelweni lesi ukuthi zilondoloze imvelo kulandela ukwanda kwemlilo etshisa amadlelo lemvelo.
Uthe izinga lokutsha lokumemetheka kwemlilo liphezulu esabalweni seMatabeleland North kulandela esabelweni seMashonaland West.
“Kulezinyanga kusukela kuMpandula kusiya kuLwezi abalimi sebekhangelele ukuthi izulu selingana loba yisiphi isikhathi, ngakho abalimi bamatasa balungisa amasimu, betshisa amabibi lamahlanga.
“Lokhu kubangela ukuthi imlilo le imemetheke isuke itshise amadlelo lezihlahla kusale sokuligceke kungasela zihlahla ezivalela umoya. Ayisizo zihlahla lamadlelo okuhlaselwa ngumlilo kodwa lezinanakazana zeganga kanye lezifuyo.
“Ngakho-ke ngikhuthaza abalimi ukuthi nxa betshisa amabibi kumbe amahlanga, kabazise omakhelwane njalo bangatshisi nxa kulomoya ngoba yikho okwenza imlilo le imemetheke ibhidlize imvelo,” kulandisa uMnu Nyoni.
Uthe kulezinye indlela ezingcono kulokutshisa ezingaphathisa amahlanga lamahlamvu.
“Sesibikelwe ukuthi kukhangelelwe izulu elingaphansi kwalokho esikujwayeleyo, ngakho-ke uHulumende usexwayise abalimi ukuthi balime ngendlela yeNtwasa.
“Ngesizatho lesi singawatshisi amahlanga lamahlamvu kodwa kasiwasebenziseni ukwembesa umhlabathi ukwenzela ukuthi umdaka ungaphangisi uphephuke esithi thina ngesiLungu yi-mulching,” kuphetha uMnu Nyoni.
