uMthunywa
Ethel Ncube
KULEQEMBU elitsha le-rhumba elidabuka eTsholotsho elinikwe imali yokuyafunda ukutshaya amakatali kulandela ukukhipha imbabazane yengoma yalo yakuqala.
Iqembu labasakhulayo leli, laziwa kakhulu kulezinsuku ngokuthi ngama2K, libizwa ngokuthi Abafana beZhwane, ngelamajaha amathathu azalwa koMakhaza eTsholotsho abalisa uClawudasi Khumalo, Lindani Phiri loNkosikhona Dube.
UMthunywa uxhumane lomaneja waleliqembu uDj Mapressa ochaze kabanzi ngeqembu leli.
“Iqembu labasakhulayo leli lihlabela umdumo we-rhumba. Ingoma yabo eyiyo eyenze baze bathola i-scholarship sokuyafundela ukutshaya amakatali ithi Isiko eyamukelwe ngezandla zombili nguzulu enkundleni zokuxhumana.
“Ingoma le iyi-single. Ingoma le kwakumele iphume ngoMpalakazi nyakenye ngoMpalakazi bayibamba yangaphumi yaze yaphuma khathesi,” kubika uMapressa.
Abafana beZhwane
Uphinde waveza ukuba ingoma le idume kakhulu yaze yatholela iqembu leli uncedo.
“Ingoma le ijabulise abanengi nampo abafana sebethole i-scholarship sokuyafundela ukutshaya amakatali. Bengapasa esikolo samakatali bazakwenelisa ukurekhoda mahala babuye bangene kuThwala Izikhwama Festival bebhadalwe futhi.
“Abafana ngabenu zulu omuhle, asibasekeleni bakhule labo emculweni,” kuphetha uMapressa.
