uMthunywa
Ethel Ncube
NGENXA yokuthanda izikhundla kulomunye umkhokheli webandla le-12 Apostles eGuwe eNkayi otholakale efuye ihlosi ngenhloso yokuthi aphakanyiswe ebandleni.
Isiga lesi sivele kunyanga ephelileyo lapho obekunxuswe amalunga eZiyoni esiqintini seGuwe ukuthi azokhipha impahla yobuthakathi ebigcinwe ngabantu.
Kuzwakale ukuba uThophela Gumede ohlala esiqintini esingaphansi kukaSobhuku uGrandman Mpofu utholakale efuye ihlosi emzini wakhe.
UMthunywa uzwe ukuthi ngalelolanga unkosikazi kaGumede wavakatshela abaphurofethi laba esiyabukela kuhlahlulwa ezinye izakhamizi kodwa wamangala esebikelwa ukuthi umkakhe laye ufuye inyamazana yeganga egumeni.
UMthunywa uzwe ukuba inyamazana le ibigeziswa samuntu, amanzi akhona asetshenziswe ukuchela ebandleni leli ukuze abanye abaphurofethi bangenelisi ukuphurofitha.
Iphephandaba likazulu lixhumane lomunye okhonza ebandleni leli uMnumzana Dumo Moyo oveze ukuthi bona abamangali ukuzwa kuthiwa umdikoni uGumede ulento enjalo.
“Kasiqalisi ukuzwa indaba le kaGumede, kwake kwakhulunywa ebandleni ngelinye ilanga engekho.
“Abaphurofethi bebengasasukumi esontweni nxa ekhona lanxa abantu bengaze bakhulume amaphupho bona bakutshaye indiva kwedlule nje engachasiswanga besenziwa lihlosi likamdikoni elibanyathezelayo,” kulandisa uMnu Moyo.
Uqhubekele phambili eveza ukuthi uGumede lo ubesesatshwa ebandleni ubethi angakhuluma ulutho abantu balandele kuphela loba bengasuthiseki.
“Abafundisi labo bebengawuvuli umlomo nxa sekukhuluma umdikoni, bebethula kwenziwe lokhu akutshoyo,” kutsho uMnu Moyo.
Intatheli ixhumane lesinye isakhamuzi uNkosazana Loyiso Dewa ochaze ukuthi wayekhona kuhlahlulwa ngehlosi.
“Sasihambe ukuyabukela okwakusenziwa sibone lezinto ezazikhitshwa ebantwini lonkosikazi kaGumede ngamangala sokuthiwa laye kasondele phambili bamtshele ngehlosi ahlala lalo.
“Bamtshela abantu beGuwe belalele ukuthi ayethatha inyamazana le umkakhe ayisebenzisa ukuganga esontweni. Ngamangala evuma ukuthi uzabuya layo lanxa waze wabuya layo ebusuku ngelanga elilandelayo,” kulandisa uNkszn Dewa.
UMthunywa ukhulumisane lomunye wabaphurofethi balelibandla owale ukuveza igama lakhe ngoba esesaba ukuxotshwa ebandleni.
“Ukuthi umdikoni uyaganga sasikubona kodwa sisesaba ukumtshela bhadla ngoba engavumi lula akutshelwayo njalo lokhe kwakhitshwa ihlosi lakhe leli enkozweni sibethwa ngumoya uvalo lesidina esasisiba lakho akusekho,” kutsho omunye umphurofethi webandla leli.
Imizamo yokukhuluma loMnu Gumede yehlule ngoba umakhalekhukhwini wakhe ubengangeni.
