uMthunywa
KULABANTU abatshayane okwabelusi bebumbelana amabele enkomeni bekhohlwa ukuba ukulwa kuyabulala! Lokhu kuvele ngemva kokunanzelela kwethu ukuba kusukela mhlaka-23 kusiyafika u-25 Mpalakazi 2015, abantu balwe kwaze kwafa ababili abezwakeleyo.
ENkayi, emavinkilini eCanaan, kulo-Xolisani Moyo, Mabhongwane Moyo, Andile Moyo lo Twa Moyo abesigabeni sakoNzuza abatshaye esinye sezakhamizi zakuleso sigaba uMafika Mathonsi (46). Kubikwa abane laba bebonde umamangala ngenduku langenqindi ngemva kokuxabana. Ukutshaywa lokho kutshiye uMathonsi elamanxeba ayingozi umzimba wonke. Lokhu kwenzakale mhlaka 23 Mpalakazi ngo 6 ntambama.
ELusulu, Binga esigabeni seNakaluba kuloNelson Mudimba (18) ohlala ngakibo kaNickson Mudimba obotshelwe ukugwaza unkazana oleminyaka engu — 17 emethesa icala lokweba amabhanzi abephekelwe ikhisimusi. Lokhu kwenzakale mhlaka 23 Mpalakazi ngabo 8 ntambama.
EHwange kulendoda eyaziwa ngelikaGari ebalekele icala lokutshaya uPeter Mupayiwa welokitshini leMpumalanga ngesikhali esingazakalanga wamdabula indebe yangaphezulu yomlomo. Lokhu kwenzakale phakathi kwamabili mhlaka 23 Mpalakazi. Kubikwa ababili laba bebebanga utshwala koMpofu Sports Bar.
Kusenjalo, kuloBongani Moyo odabuka esigabeni saseMbondweni eNkayi okubikwa etshaye uBenhilda Kuzora (25) isakhamuzi sakoSifisosikazulu eNkayi. UMoyo ugoqe inqindi wadaza uBenhilda ubuso bonke sengathi ulwa lenye indoda yena etshaya umuntu wesifazana athi ulesikwelede sakhe! Lokhu kwenzakale eOld Business Centre eNkayi mhlaka 24 Mpalakazi ngabo 6 ntambama.
ENyathi mhlaka 24 Mpalakazi ngabo 5 ntambama, kubikwa uHloniphani Nkomo (19) esele eloduma ngemva kokutaklazelwa phezu kwebhasikili ngomunye wakhe asebenza laye ku Plot 10 eQueens Mine. Olimaze uNkomo lo waziwa ngelika Allen Nyoni kuphela njalo uhle watshaya utshani ngemva kwaleso sehlakalo.
Mhlaka 24 Mpalakazi ngabo 3 emadabukakusa, kwenzakale inkemenke yendaba bakwethu etshiye izakhamizi zakoMathe zinkemile. Kubikwa kuloSinos Ncube (21) odabuka khona koMathe eTsholotsho, ogwazwe umzimba wonke yisigangi angasenelisanga lokusiqamba ngenxa yobuhlungu bamanxeba abelawo. UNcube wacina eficwa ethe daca emgwaqweni ekuseni. Ugogo wakhe nguye owamgijimisela esibhedlela engasakhulumi okuyilapho afika waphelela khona.
EMbembesi koMadlenyoni, kubikwa uNkosithulisile Mpofu (22) ehluleke ukuzithoba lokugcina ukuthula ngemva kokuxabana loRueben Mpele (34) ngenxa yemali. UMpofu utshaye uMpele kabuhlungu ebusweni lasekhanda wamtshiya elezingozi ezibulalayo. Ubesebenzisa induku lenqindi. UMpele usele elenduma ekhanda njalo evuvuke umlomo. Utshaywe mhlaka 25 Mpalakazi ngo 4 emadabukakusa.
Lasezindlini bekukhona ukuhlukuluzana esikhathini sokuba abantu bajabule ngekhisimusi. Phela kuloKhumbulani Tshabalala (28) isakhamuzi sasesigabeni seNdengwende eLupane obotshelwe ukutshaya umkakhe uPriviledge Ndlovu (25). UMaNdlovu utshayelwe ebhawa (night club) yemavinkilini edolobho leLupane mhlaka 24 Mpalakazi ngo 3 emini. Kubikwa emtshayele ukuba ubedingani ebhawa. Umnqinde wamnqinda anduba atshayelele imbodlela yotshwala phansi eyiyo amgwaze ngayo ebunzini.
Khona eLupane njalo, kulokhulu uSibumba Tshuma (73) okubikwa ubelomkhuba wokutshaya umkakhe kusukela ngoZibandlela lonyaka kwaze kwayafika ngeKhisimusi lapho okucine kuvela khona lolodaba. UTshuma ubetshaya ugogo uBetty Mabhena (50) kungakhathalekile ukuba ukuluphazisana kwabo bebonke nje kuyisipho ngoba ubemtshaya kungela sizatho esibambekayo. UMabhena uwubekezelele umuzi wakhe!
NgeKhisimusi, emavinkilini eGonye kubotshwe uKwanele Maphosa (43) odabuka kulesosigaba esetheswa icala lokutshaya uSmart Bhebhe (46) ngenqindi esifubeni. Lokhu kwenzakale ngabo 10 ntambama etshwaleni. Kusenjalo, emavinkilini eNkuba, eNkayi kutshaywe uXolani Gumede ngesikhathi losuku okufanayo. UGumede ubhotshozwe ikhanda ngelitshe nguLameck Ngwebu besetshwaleni ngemva kokuxabana nje enkulumeni. Sikhathi sinye njalo, emavinkilini eZenka kutshaywe uThabani Sibanda odatshulwe indebe yangaphezulu ngomunye umuntu amchaze njengesinye sezidakwa ayenatha lazo kodwa aye ngasamazi ngoba laye ephelile.
Mhla weKhisimusi njalo, uMelusi Moyo (29) ugwaze wabulala uSidingani Ndlovu (30) ngengqamu yohlobo lwe okapi ngemva kokuba umuyi echithe utshwala bakhe (calabash)! Kubikwa umuyi ethinte inkezo kaMoyo ngephutha nje kodwa uMelusi walile ukuxola.
Bakwethu ngingaloba eyinye njalo indaba epheleleyo ngezokutshayana. Ngcono ngilubambele lapha loludaba.
Umbuzo esilawo thina abezobudlelwano bukazulu lamapholisa eZimbabwe Republic Police (Z.R.P) yikuthi, kungani kuseselabantu abaqakathekisa ukulwa kangaka? Mhlawumbe ukucebisana esikwenza nsukuzonke kakufinyeleli kwabanye bethu emphakathini! Senzeni pho ngoba ukulwa lokutshayana kuyabulala? Kungasenani, thina silifisela umnyaka omutsha omuhle njalo olokuthula lempumelelo! Sidibane kumnyaka ozayo.
Thumelani imibono yenu kunombolo yeWhatsApp u– 0783 185 092 kumbe ebulenjini ku – [email protected] / [email protected] / [email protected] .
