uMthunywa
Musa Janga
KULENDODA yeDouglasdale koBulawayo etshiye inkundla yeTredgold ibulawa zimbambo ngemva kokucatsha ngomunwe ithi yatshontsha inkomo ngoba ifuna ukuyalobola.
Umsolwa uConstance Mpofu oleminyaka yokuzalwa engu-25 umiswe emthethwandaba weTredgold kuviki ephelileyo esetheswa icala lokutshontshela uTimothy Mlambo ongumamangala kulelicala inkomo.
Umtshutshisi uMnumzana Nkathazo Dlodlo ubikele inkundla ukuthi mhlaka 11 Mpandula ekuseni, umsolwa wabanjwa xhaka eqhuba inkomo kamamangala eyingenisa esibayeni.
Lokhu kwasolisa umamangala owathi embuza ngalokho wathi inkomo le ibifohlile esibayeni yikho eyibisela.
Ngoba engasuthiseki ngempendulo kamsolwa, umamangala wadingisisa ukuthi inkomo le yayingabe ifohle ngaphi wasenanzelela ukuthi kwakulezinye ezintathu ezazingekho esibayeni njalo locingo lwesibaya lwaluqunyiwe.
Umamangala wacela umsolwa kanye lomngane wakhe uWesele Ncube ukuba bamncedise ukudinga inkomo zakhe yena ayebika udaba lolu emapholiseni. Esemapholiseni wathola ucingo lokuba inkomo sezibonakele egangeni.
Amapholisa adingisisa kuzisebenzi ngaloludaba umsolwa wakhanya egagasa okwacina kubangela ukubotshwa kwakhe.
Emiswe phambi komthwethwandaba umsolwa ulivumile icala lakhe, ebuzwa ngumantshi ukuthi watshontshelani uzame ukuzivikela ngokuthi wayefuna ukulobola isithandwa sakhe.
Ngemva kokulalelisisa umantshi uTinashe Tashaya uthole uMpofu elecala lokutshontsha izifuyo waquma ukuthi avalelwe ejele okweminyaka eyisitshiyagalolunye.
