uMthunywa
Nkosilathi Sibanda
UMDLALI weNgezi Platinum uXolisani ‘Scara’ Moyo ubonga abaphansi kulandela ukunqoba maviki wonke kweqembu lakhe iNgezi Platinum.
Iqembu lezimbamgodi leli selikhokhele kwehlula ukuthi yiliphi iqembu lenguqu elingayinqoba lokhe kwavulwa isizini yeCastle Lager.
Leliqembu lilandelwa kungalane yeligi ngosowabo iFC Platinum eyaqeda iyintshantshu nyakenye. INgezi isiqede imidlalo elitshumi lanhlanu inqoba okuyikho okuzenza iBulawayo Chiefs ingene ilovalo kumdlalo odibanisa amaqembu womabili ngeSonto eLuveve.
“Ngiza koBulawayo ukuzoncedisa ukuthi iqembu lami liqhubekele phambili linqoba. Ngizizwa ngilentshukuntsho yokutshayelela amabhola phakathi,” kutsho lumdlali odume ngelithi ‘Scara’ ekhuluma lephephandaba likazulu.
Umdlali lo, odabuka koBulawayo uthe iqembu lakhe lihuba ngenjabulo enkambeni ngokusondelela esigabeni sokuthwala inkezo yeCastle Lager abakiso. Phakathi kokujabula lokhu, amehlo athe nhlo kumqeqetshi uTonderai Ndiraya.
Nguphi umqeqetshi loba iqembu elingakhona ukubamba uNdiraya ngendlela aseqhube ngayo? Umqeqetshi lo kusegcekeni ukuthi ukhaliphile kwezenguqu ngoba ngokunqoba kwakhe, usethole inhlonipho kwabanye abaqeqetshi kuligi ephakemeyo.
“Siyabonga ngokuhlangana lomqeqetshi okhaliphe njengoTonderai Ndiraya ngoba usesifundise ukuthi singabi lendaba lendlela amanye amaqembu aqhuba ngayo kodwa sidlale elethu ibhola,” kuqhubeka uMoyo.
Kungxoxo yakhe lephephandaba likazulu, uNdiraya ubike ukuthi loba iqembu lakhe lilabasekeli abambalwa, okwenza badlale ibhola banqobe lusekelo abalutholayo.
“Konke esiyikho khona kungenxa yosekelo esilutholayo,” nguNdiraya lo.
Match Day 15:
NgoLwesihlanu: Black Rhinos v Chicken Inn (National Sports Stadium)
NgoMgqibelo : FC Platinum v Shabanie Mine (Mandava), Herentals v Nichrut (National Sports Stadium), Harare City v Highlanders (Rufaro), Bulawayo City v Yadah (Barbourfields)
NgeSonto: Caps United v Mutare City Rovers (National Sports Stadium), Chapungu v ZPC Kariba (Ascot), Bulawayo Chiefs v Ngezi Platinum Stars (Luveve), Triangle United v Dynamos (Gibbo)
