uMthunywa
Ethel Ncube
KULENDODA yeSiabuwa eBinga esele ikhuza umhlolo kulandela ukukhukhumala isisu sangathi ngesikananane ngesikhathi izama ukuncinda uluju lwemvelo lonkosikazi wenye indoda.
Imbedumehlwana le yenzakale kumaviki ambalwa adluleyo lapho uMnumzana Elias Moyo obejola loNkosazana Melody Mudimbe othethwe yinjiva athe ezama ukuthi afohle emzini ongasi wakhe wakhukhumala isisu kwangathi sizadubuka, uMthunywa uyakuveza lokhu lamhlanje.
Esinye isakhamuzi esikhulume lentatheli uNkosazana Maureen Sibanda uchaze ukuba indaba kaMnu Moyo isemlonyeni yabantu.
“Kukhanya uMoyo wayefuna ukufohla emzini wenye indoda njengoba ubejola loMudimbe kodwa isimanga yikuthi nxa ezama ukuhlangana isisu sakhe sikhukhumale sibe ngokunye.
“Umama abezikhohlisa laye umkakhe useGoli kungakho kukhanya watshiya ethiye umkakhe esenzela ukuthi kungabi ngitsho loyedwa ongena emzini wakhe,” kubika uNkszn Sibanda.
Uqhubekele phambili echaza ukuthi uMnu Moyo loMaMudimbe sebelesikhathi eside bethandana.
“Abantu bebevele besola ukuzwana kwababili laba ngoba uMoyo ubehlala esemzini wenjiva okwenza kwaba lemibuzo eminengi.
“Khathesi sokuphumele egcekeni njalo lokhu wakutshela ayenatha labo etshwaleni. Kukhanya sibili uMudimbe wafaka ulunyoka njalo lokhu kwakumtshela nje ukuthi aqaphele ngoba uzalimala,” kubika uNkszn Sibanda.
Iphephanda likazulu lixhumane lalowo ocatshangelwa ukuba uthandana loMoyo, uNkszn Mudimbe ochaze ukuba kalaso isikhathi sokukhuluma lamaphephandaba.
“Ngiyaxolisa ngalokhu okubuzayo angilampendulo kukho. Mina ngendile ngabe ungibuza ngomkami ngabe ngiyakuphendula hatshi omunye umuntu,” kubika uNkszn Mudimbe.
Ekhuluma lentatheli uMnu Moyo owakhukhumala isisu uchaze ukuba yena wayethi laye abone ukuthi usaqinile yini.
“Uyabona lapha sufuna ngichithe umuzi wabantu. Isisu sasikhukhumala size sicazimule nxa ngizama ukuhlangana laye kodwa ngingekela sibuyele endaweni yaso.
“Ngilapha nje ngilokhu ngithithibele ukuthi kwakusenzakalani sibili kimi,” kuphetha uMnu Moyo.
