uMthunywa
Nomthandazo Ndlovu lo Arnold Ndlovu
ZISAMANGELE izakhamizi zesigabeni seDiba ePlumtree ngemva kokubona unwabu luziphaquzela umhlanga wegwayi cala celeni ezitolo, uMthunywa ukuzwile lokhu.
Lesi siga esilokhu siyindaba mlonyeni esigabeni lesi senzakale ngoLwesithathu ngeviki ephelileyo lapho uMnumzana Mandla Sibanda adibana khona lonwabu lolu luphuma kwenye indlu umhlanga wegwayi usemlonyeni luzihambela.
Abanye ababikele uMthunywa bathe umhlanga wegwayi lo wawuthunqa intuthu.
Ekhuluma loMthunywa uMnumzana Mandla Sibanda oyisakhamuzi sakule indawo njalo onguye owaqala ukubona umhlola lo, uthe selokhu wathwetshulwa yingwe kakaze abone into enjalo.
“Mina angilankani ngilapha, kumbe kuyangihlolela lokhu, mina ngangiphuma ebhawa ngithi ngidlula komunye umkoto ngabona nantu unwabu luphethe umhlanga we-Everest ngomlomo njengomuntu obhemayo.
“Lokhu kwangethusa ngamemeza abanye ababuya sabonisana umhlola lo, lapho lwaselumile kuphela lulokhu luzibambele umhlanga lo owawusuyingxenye ngingazi kumbe eyinye ingxenye lwasoluyibhemile kumbe njani,” kuchaza uMnu Sibanda.
Esinye isakhamuzi sakule indawo esithe singuMnumzana Bekezela Sibanda laso esabona unwabu lolu lubhema sithe lo kwakungundofa sibili.
“Lapho okwaphuma unwabu lolu vele kulento ezinengi ezingaqedakaliyo ezenzakala khona, kuqala endlini leyo kwatholakala ubabhemi elele embhedeni, ngelinye ilanga sezwa kukhala umntwana phakathi kobusuku kodwa akuhlali muntu.
“Ilanga lingatshona abantu abanengi bathi emkotweni oduze lezindlu lezi kubonakala isithunzi esikhulu esingani ngesomuntu, khathesi sesibona unwabu olubhemayo, kukhona okutshaya amanzi lapha. Abadala kumele babone icebo kulungiswe lapha ngoba kukhulu esizakubona nxa kungalungiswanga,” kutsho uBekezela.
Kubikwa unwabu lolu lwathi ngokubona solukhangelwe ngabantu lwalahla igwayi lwabaleka lwaya esihlahleni esasiseduze lwanyamalala.
“Abantu bagcwala bekhulumisana ngonwabu lolu oluyisimanga, lwacina lulahla igwayi lwabhodlela embodleleni yotshwala eyayiseduze lapho lwabaleka lwakhwela esihlahleni.
“Isimanga yikuthi salandela sesiludinga kodwa asizange silubone ukuthi lwasuka esihlahleni lwaya ngaphi, yikho lapho esabona khona ukuthi asonwabu lolu,” kuphetha omunye umama owayelapho othande ukwaziwa ngokuthi nguMaDube.
