uMthunywa
Gladmore Ncube
MAHLABEZULU amahle lamuhla sixoxa ngodaba lwalaba abangafuni ukubona abanye abantu bephumelela, abathi bengabona umuntu esenza kuhle sebemdlela umona.
Ubuthakathi buqala khonalapho, akumelanga uthi ungumuntu usole nxa omunye umuntu esenza kuhle kakhulu ngoba vele lasendulo babekhona abayanga labacebileyo.
Abelungu siyabasola kwezinye indawo kodwa laba abantu balayo inkalipho eyokuthi bengabona umuntu esenza kuhle bambuke qede lapho bamhlalise phansi bambuze ukuthi ukwenze njani ukuze abe phezulu.
Ngokwenzenje bayathola amaqhinga okuthi bazikhuphule labo.
Manje thina ungabona umuntu ephumelela mhlawumbe seqhelise indlu yakhe siyaqala ukumnyeya sokuthiwa uzenza ngcono. Abanye baze bafike ezingeni lokumphosa. Pho-ke nxa sumloyile lowo muntu ngubani ozakufundisa ukuthi kumele wenze njani nxa ufuna ukuphumelela empilweni.
Ungabi lomhawu ukuthi umntakaNazibani banyana uyatshaya esikolo ngoba vele ayisithi sonke esaphiwa isikolo. Kukanengi sibabona kuthiwa lowana sehlanyiswa yisikolo kungela lutho bemloyile abalomhawu.
Ukhona omunye umama owake waba lomhawu ngabantwana bakamakhelwane bakhe ababesebenza kuhle kakhulu, kwathi kuyiKhisimusi wacabanga ukuthi ebafakele wasephambanisa watshintshanisa imiganu kwafa abakhe abantwana.
Mahlabezulu kumele sifunde ukukhwabitha abantu abenza kuhle empilweni ngoba vele inkalipho ayilingani njalo asikhangeli izinto ngamehlo afanayo.
Kulabanye esihlala sibezwa besithi uGumede kalayo imali engako, ngundofa omupha imali leyo. Inkulumo ezinje zibangelwa ngumhawu. Khona nxa ukhuluma usenzenje uyabe wake wambona lowondofa ngawakho na amehlo kumbe njalo nguwe owamnikayo lowomuntu.
Umhawu onje yiwo owenza abantu ukuthi bahambe bayethenga ondofa abacina sebebathwalisa nzima ngomhawu kuphela. Mthwakazi omuhle, asizifundiseni ukuthi singabi lomona sikhwabithe lapho okuhle khona njalo sivume ukuthi izandla kazilingani ezinye zimfitshane.
