uMthunywa
YiNtatheli kaMthunywa
KULEMULI yeChipale eBinga esele ibambe owangaphansi ngemva kokuvela kokuba kulelunga lemuli le elicela ukuya emacansini lonkosikazi womzukulu walo. Imuli yakoNleya ihlale phansi kumaviki amabili adluleyo ichothoza isenzo sika Mnumzana Gift Nleya sokuhlukuluza unkosikazi womzukulu wakhe, uNkosazana Mary Mudenda ngokumcela ucansi.
Intatheli ixhumane lelinye ilunga lemuli le, uNkosazana Samkele Mudenda ochaze ukuba udaba lolu lulihlazo njalo lubehlisa isithunzi njengemuli.
“Kunzima ukuthi ngingaqalisela ngaphi kodwa udaba olunjalo sike sahlala phansi njengemuli sazama ukuluhlafuna ukuze senze isinqumo esiqondileyo. Okulihlazo yikuthi uNkszn Mudenda ngumalukazana osanda kufika kodwa umalume womkakhe usefuna ukudla umzukulu wakhe izithende.
“Eqalisa ukubika ukuba umalume uyamlandela enkunini ngangisithi uyaphosisa. Ngathi kwelinye ilanga wadlula engitshela esiyatheza ngalandela ngathi ngifika lapho okuthezwa khona ngabona umalume ekhonapho ngahle ngakholwa ukuthi udaba ayesibikela ngalo luyenzakala,” kubika uNkszn Mudenda.
Uqhubekele phambili echaza ukuba lindaba isibangele inzondano emulini.
“Umalume lomzukulu abasezwani njalo kabasathembani ngitsho. Kukanti umalume lomzukulu lo amcela ucansi sebeyingwe lenja ngemva kokuthoniswa kwendaba le. Ngesikhathi kukhulunywa umalume kazange awuthi vu umlomo, wathula angani kakho waxolisa kuphela wazithulela.
“Kuyayangisa ukuthi umuntu acele ukuhlangana emacansini lomzukulu wakhe. Asazi mhlawumbe ngumuthi kumbe njalo kukhona okunye okumenza afise ukwenza isenzo esibi kangaka? Lokuthi abantu bazamkhangela njani sibili angikwazi.” kuchaza uNkszn Mudenda.
Ekhuluma loMthunywa uMnumzana Nleya onguye owacela ucansi kumzukulu wakhe walile ukuphumela egcekeni ngodaba lolu.
“Angilampendulo njalo angikhulumi lomuntu engingamaziyo ngendaba ezibhidliza imitshado,” kubika uMnu Mudenda.
UMthunywa uphinde waxhumana lo Nkszn Mudenda onguye owayelandelwa ngumalume enkunini.
“Ngaqala ngiqinisela ngimkhuza ngokucela ucansi kimi mina ngingumzukulu ekhaya. Ngacina ngibikela abadala ukuba kangisakhululekanga ngenxa yesizatho sokwala ukwenza ucansi lomalume. Lokhe kwathoniswa udaba lolu asiphanani mlomo ngitsho kodwa mina angilandaba, ngangingeke ngembathe ingubo lesihlobo somkami,” kuphetha uNkszn Nleya.
