uMthunywa
Musa Janga
KULEJAHA lakoBulawayo elilobe ugwalo olumayelana lokuhlukunyezwa kwabesifazane kanye labantwana endaweni ezitshiyeneyo.
UPhilip Sithole uthe ubone kuqakathekile ukuthi alobe ugwalo lwakhe olulesihloko esithi Esizibeni Sezinyembezi ngoba ebona ukuthi udubo lokuhlukunyezwa kwabesimame kanye Labantwana lokhu lumemetheka.
Uthe udubo lolu uqale ukulunanzelela emaphandleni kwaba yinto eyamnika intshukuntshu yokuthi alobe lolugwalo ngoba loludubo lumhlukuluza emoyeni.
“Ugwalo lolu lumayelana lokuhlukunyezwa kwabantwana emaphandleni lobunzima abesifazane abahlangana labo emakhaya ikakhulu labo abatshiywa ngomkabo. Lababantu bahlukunyezwa ngazo zonke indlela kugoqela lakwezemacansini.
“Isiqokoqela sokuba ngilobe lolugwalo yilokhu engazibonayo ngawami amehlo ngesikhathi ngihambe ekhaya. Nganazelela ukuthi kulokuhlunyezwa kwabantwana kanye lamanina. Amanye amanina ngabalekelwa ngamadoda okwenza asale enakekela izimuli ewodwa.
“Impilo abayiphilayo ibuhlungu bahlangana lezilingo ezinengi njalo baswela amandla okuthi bazilwele ekuhlukunyezweni. Ngakho ugwalo lolu ngaluloba ukuze udubo lolu lukhitshwe egecekeni ukuze kudingwe indlela abahlykunyezwayo abangasizwa,” kuchaza uSithole
Ubuye walandisa ngohambo lwakhe lokuba ngumlobi
“Ukuloba ngakuqala ngikubanga lika qala ngesikhathi ngisenza fomu 2. Ngabhala indaba kuAnthology ethi Izibongo zika Joshua Nkomo lakwelinye elithi Incwadi Encane ngasengibhala olwami ugwalo ngomnyaka ka 2015 elithi Izigigaba ZeThogotho lonyaka sengilobe uEsizibeni Sezinyembezi.”
Uqhubekele phambili esithi lolugwalo waqala ukululoba ngomnyaka ka2015 njalo lize laphuma lonyaka.
“Ugwalo lolu lungithethe isikhathi ukuze ngiluqede ngoba bengifuna liphume ngendlela efaneleyo njalo bengifuna ukuthi ngilobe konke ebengifisa kwaziwe ngumphakathi, nguSithole lo.
Uphethe ngokuthi ugwalo lolu lwadindwa yiSunshine Publisher’s kaMihla Sitsha koBulawayo.
