uMthunywa
YiNtatheli kaMthunywa
ABALIMI endaweni ezitshiyeneyo zelizwe sebekhuthazwe ukuthi balime ukudla okunengi ukuze benelise ukuthengisa okunye.
Ekhuluma loMthunywa uMnumzana Elfas Moyo ongumlimi eMatabeleland South uthe ukulima yibhizimusi enkulu eZimbabwe.
Ibhizimusi yokulima yibhizimusi enkulu eZimbabwe nanko phela ukudla kuyadingakala elizweni kusa kwamalanga. Ngakho-ke kuqakathekile ukuthi abalimi balime ukudla okunengi ukuze benelise ukuthengisa okunye ukuze bathole imali.
“Izikhathi ezinengi emaphandleni abalimi balima ukuze batole ukudla kwabo lemuli zabo nje qha. Sokumele bavule inkophe babone ukuthi ungasebenza nzima ulakho ukuthola imali ehle ngokulima.”
Uthe kufanele kube lezindima ezilinyelwa ukudla lezinye ezilinyelwa ukuthengisa.
“Umlimi munye ngamunye kumele abe lendima yokudla kwemuli yakhe aphinde abe lendima yokuthengisa.
“Lokhu kuzabaphathisa ukuthi bathole inzuzo ezakwenza ukuthi benelise ukuziphilisa lemuli zabo,” kulandisa uMnu Moyo.
UMnu Moyo uthe ukulimela ukuthengisa kuqakathekile ngoba kulendleko ezibakhona ngesikhathi kulinywa.
“Zinengi indleko ezibakhona ngesikhathi kulinywa ezigoqela ukuthenga inhlanyelo, amakhuba okulima kanye lefethalayiza kungakho-ke imali etholakala ngemva kokuthengisa izilimo iyenelisa ukuvala indleko lezo,” kuchaza uMnu Moyo.
UMnu Moyo uqhubekele phambili esithi abalimi balakho ukulima izilimo ezifana lendumba ngoba zilomkambo omkhulu.
“Indumba ngezinye izilimo abalimi abangazilima bazithengise ngoba umkambo wakhona ubanzi njalo ziphangisa ukuvuthwa.
Uphethe ngokucebisa abalimi ukuthi isivuno abazasithola kumele senelise ukubaphilisa kuze kufike isikhathi sokuvuna kumnyaka ozayo.
