uMthunywa
YiNtatheli kaMthunywa
INGUNDABAMLONYENI indaba yepholisa leNtabazinduna okubikwa ukuthi lathenga imbuzi ezitshontshiweyo kwesinye isakhamuzi.
Iphephandaba likazulu lizwe ukuthi uRoby Josphat olipholisa eNtabazinduna wathenga imbuzi ekwazi ukuthi zitshontshiwe njalo zingelawo amaphepha afaneleyo.
Intatheli ixhumane lesinye isakhamuzi UMnumzana Dingani Ndlovu ochaze ukuthi amapholisa akibo alobugwelegwele.
“UMaMpofu watshontshelwa imbuzi wayabika emapholiseni, uthe ngemva kwalokhu wananzelela ukuthi ezinye zazicatshile wayabika kwabomthetho. Amapholisa athe esecubungula indaba le kwavela ukuthi imbuzi lezi zatshontshwa njalo zathengwa lipholisa okungekho emthethweni,” kutsho uMnu Ndlovu.
Uqhubekele phambili esola kakhulu indlela amapholisa asebenza ngayo icala leli.
“Kuthe sokutholakele ukuthi ipholisa lilesandla ebuseleni alizange lenziwe lutho kwaphelela emoyeni.
Umbuzo engilawo yikuthi manje sizabikela bani inhlupho zamasela njengoba ababona ngemthetho sebesona labo babuye bazikhulule bodwa. Akusiphathi kahle lokhu sicela omkhulu wabo akhangelisise ukusebenza kwabo,” kubika uMnu Ndlovu.
Ekhuluma loMthunywa umnikazi wembuzi uNkosazana Irene Mpofu uveze ukungaphatheki ngendlela okwaphenywa ngayo icala lokucatsha kwembuzi zakhe.
“Ipholisa leNtabazinduna lathenga imbuzi zami eziyi-12 kwelinye isela zingelancwadi layazifihla koninazala. Zithe zitholakala ngafica ezinhlanu kuphela. Ngithe sengibikele amapholisa ngaloludaba angithembisa ukuthi isela elatshontsha imbuzi zami kanye lalo owazithengayo bazavalelwa kodwa lokhu akuzange kwenzakale,” kutsho uNkszn Mpofu.
Ubuye waveza ukuthi ucabangela ukuthi kukhona ukufumbathiswana okwenzakalayo phakathi kwamasela lamapholisa ngokwawo.
“Icala lathethwa njani mina ngingekho umamangala. Imbuzi zami ezinye nxa ngizibuza epholiseni angitholi mpendulo esuthisekayo. Silandele njani umthetho nxa bona kuyibo abasitshontshelayo. Ngibuhlungu kakhulu ngezifuyo zami,” kutsho uNkszn Mpofu.
Imizamo yokuxhumana lomsolwa uHadebe yehlule ngoba inombolo zakhe zikamakhalekhukhwini bezingangeni.
UMthunywa ukhulume lesikhulumi samapholisa seMatabeleland North uInspector Siphiwe Makonese oveze ukuthi umbiko onjalo abakawutholi.
“Ngibuzisile enkambeni yakhonangale ngathola ukuthi akulacala elinjalo elibhalwe emabhukwini amapholisa,” kubika uInsp Makonese.
Intatheli ibuye njalo yaxhumana lokhansila wakulindawo uMnumzana Qongo wabika ukuthi ukungalotshwa phansi kwecala leli kutshengisela ukuthi amapholisa azama ukuvikela omunye wabo.
“Umnikazi wembuzi wahamba wayabika icala leli emapholiseni kodwa akuzange kubotshwe muntu njalo icala leli alizange libhalwe phansi okuyisitshengiselo sokuthi amapholisa azama ukuvikela omunye wabo,” kuphetha uMnu Qongo.
