uMthunywa
Ngisengozini, umkami uthanda abafazi
Impilo yami isengozini. Umkami uthanda abafazi ngingathi kedlulwa yisiketi. Khathesi sengihlala ngicatshela amantombazane ajola lawo. Enye saxabana saze safikisana emapholiseni.
Ngesikhathi sikhuthazwa ngosuku lomtshado wonke umuntu wayethi emtshadweni kuyabekezelwa. Angazi ngempela ukuthi babekhuluma ngento enje yini. Engifuna ukwazi yikuthi kubekezelwa kuze kube nini? Ngiqhubeke ngibekezela loba impilo yami isisengozini?
Impendulo:
Akukuhle ngitsho ukuthi utshadile ube sesizini njalo akumelanga umtshado ubeke impilo yakho engozini.
Usuke wamtshela yini umkakho ngakho konke lokhu? Kubalulekile ukuthi akwazi ukuthi ukungaziphathi kahle kwakhe kufaka wena engxabanweni labantu ongabaziyo. Kuyinto embi ngempela okumele uyithathele inyathelo ukuhlukunyezwa ngabanye abantu besifazane ikakhulukazi abakuhlukumeza ngomkakho. Nxa kuyikuthi uyabazi laba besifazane kungakuhle ubavulele icala. Amapholisa angakunika i-protection order yokuthi laba abesifazane bangasondeli phansi kwakho. Nxa beqhubeka ngokukuhlukumeza nxa sekulencwadi ebavimbayo balakho ukubotshwa.
Kubalulekile ukuthi umkakho akwazi konke lokhu ukuze atshintshe indlela yokwenza. Yebo sifundiswa ukuthi singaphumi loba kunzima emtshadweni, sizame ukulungisa ngaso sonke isikhathi kodwa ungaze ufake impilo yakho engozini ngoba utshadile nje.
Kangikhulumisi inyanga yonke nxa sixabene
Ngicela ukubuza Khulu kwenziwanjani nxa ulonkosikazi okwazi ukuhlala citshe kuphele inyanga yonke engakukhulumisi nxa lixabene. Lokhu ukwenza ngitsho lanxa kunguye ophambanisileyo. Isimo siba sibi kuze kubonwe langabantwabethu ukuthi akukuhle phakathi kwethu. Sileminyaka engu-10 sihlala sonke kodwa lamanje siseselenkinga efanayo. Angikwazi ukuthi ngithini.
Impendulo:
Kujwayelekile ukungaboni ngaso linye kwabathetheneyo kodwa kuhlalwa phansi kukhulunyiswane. Ngeke lihlale livumelana ngaso sonke isikhathi kodwa okubalulekileyo yindlela elikhuluma ngayo nxa lingaboni ngaso linye. Kudinga ukuzwanana phakathi kwababili abathetheneyo ngoba izinto kazisoze zihlale zihamba ngendlela esifuna ngayo ngaso sonke isikhathi. Ngiyazi ukuthi usukwenze konke okusemandleni akho kodwa futhi umuzi kawulula, udinga ukuthi siwulwele nsuku zonke.
Dinga umeluleki wezomtshado loba umuntu elimethembayo elingenelisa ukuhlala laye phansi ukuze lenelise ukubeka izinhlangothi zenu lobabili. Kusobala ukuthi unkosikazi wakho ulezizatho ezenza aziphathe ngale indlela okungenzeka aphumele sobala ngazo nxa kulomuntu wesithathu ozalalela udaba lwenu. Akukho elingeke lenelise ukukulungisa nxa lobabili lifuna ukukulungisa lokwakha umuzi wenu. Mzukulu ngibona angathi unkosikazi wakho uyawuthanda umuzi wenu kungakho akazimiselanga ukuthi uqedwe yinto encane njengokuzehlisa.
Kangihloniphi umkami
Ngilohlupho Khulu, unkosikazi wami kangihloniphi njengomkakhe. Ngihlala ngimtshela ukuthi lokhu kuyangihlukuluza kodwa akalaleli. Ngifikelwa yikuthukuthela nxa ngicabanga indlela enza ngayo.
Njengokuthi nxa esiyavakatshela abakibo loba kuzafika abakibo loba ezasebenzisa imali yendlini, ngiba ngowokucina ukwazi. Kwenziwa yini ukuthi aziphathe ngale indlela? Ngizibona ngingelasithunzi njengendoda.
Impendulo:
Isenzo sikankosikazi wakho asisihle ngitsho mzukulu. Siyazi ukuthi kujwayelekile ukuthi omunye kwabathatheneyo uthatha isikhathi ukujayela ukuthi sekulomunye umuntu empilweni yakhe okumele amcabange nxa ethatha izinqumo. Abanye bathatha isikhathi ukujwayela ukuthi impilo ayisafani nxa sebendile.
Kangitsho ukuthi kumele liphile impilo angathi libotshiwe kodwa kubalulekile ukuthi unkosikazi wakho akwazise ngezinto ezenzakala emzini wenu. Akumelanga ube ngowokucina nxa ethatha izinqumo ezinjengalezi. Okubalulekileyo-ke yikuthi umtshele ukuba ukuthatha kwakhe izinqumo yedwa akukuphathi kuhle. Kungenzakala ukuthi indlela akhule ngayo yiyo enza aziphathe ngendlela aziphatha ngayo.
