uMthunywa
Yintatheli kaMthunywa
AZILAMATHE izakhamizi zeBhalula, eGwanda ngemva kokuba kukhitshwe isitho sangasese somuntu ongubaba komunye umuzi.
Isindabaphenduli le yenzakale ngenyanga ephelileyo lapho uMnu Sibangani Dube ehambe enyangeni esiyadinga usizo ngendaba ezimhluphayo emzini wakhe wabikelwa ukuba kulesitho sangasese sikababa esihlala emzini wakhe esihlukumeza unkosikazi wakhe.
Inyanga le ithe ifika emzini wakhe yafika yaqonda ekhabothini ehlala impahla zokugqoka endlini yokulala yalindoda yakhipha isitho sangasese sowesilisa okuyinto ethuse abantu.
Ekhuluma loMthunywa omunye umfakazi oqotho okhethe ukubizwa ngelokuthi Mthombeni nje kuphela uchaze ukuthi indaba yesitho wayizwa.
“Mina ngezwa kuthiwa inyanga yathi kulomuthi wombobobo owakhitshwa emzini kaMnu Dube owawugcinwa ngumfazi njalo usebenza ukuhlukumeza abanye abafazi beBhalula. Okuyisimanga ngento yombobobo yikuthi wawusebenza kubani abafazi balapha bengakaze bakuzwe mhlawumbe wawusebenza kwenye indawo,” kutsho uMthombeni.
Uqhubekele phambili echaza ukuba ngesikhathi kukhutshwa lokhu kwakulabantu bomdeni bodwa.
“Isitho lesi kuthiwa ngumuthi owalungiswayo waba yisimo sesitho sikababa okokuthi lokhangeleyo nje uzibonela isitho sangasese sikababa,” kuveza uMthombeni.
Ekhuluma loMthunywa omunye wezakhamizi zakule indawo uMnu Zibonele Ndlovu uchaze ukuthi yena wayekhona mhla kukhitshwa linto ebunjwe yabasasitho sangasese sowesilisa.
“Inyanga le yafika yenza imithanithani yayo emzini kaDube yasiveza ukuthi kukhona into ehlukuluza umama walapho ekhaya emacansini. Ngemva kwalokhu yangena endlini ingagqokanga mpahla izitshayele ukabhudula nje yasiphuma ithwele into eyayibunjwe sasitho somuntu oyindoda.
“Inyanga le yathi into le ngumbobobo osetshenziswa ngomunye umama esigabeni ukuze ahlukuluze amanina emacansini. Umama walapha ekhaya sasimhlukuluza engezwa lutho njalo engaboni okwacina kudala ukuthi lanxa esebeletha angabelethi kuhle,” kutsho uMnu Ndlovu.
Ekhuluma lentatheli uMnu Dube uthe kuliqiniso ukuthi kukhona okwakhitshwa yinyanga emzini wakhe.
“Mina ngavakatshela inyanga le ngisiyazwisisa ngokungihluphayo yangitshela ukuba kulesitho sowesilisa esisendlini yami yokulala. Isitho lesi kuthiwa ngumuntu owagangayo wasigcinisa kimi ukuba sisebenze emzini wami mina ngingazi.
“Isitho lesi angazi ukuthi ngithi kwakusani kodwa kwakungumuthi obunjwe waba sasitho sangasese sowesilisa. Kodwa-ke lokhe sakhitshwayo ngibona kulenguquko ngoba umntwana ubegula esesibhedlela kumele ahlinzwe odokotela behlala bedlulisela phambili ilanga lakhona kodwa khathesi sebemamukele, kukhanya uzasila,” kutsho uMnu Dube.
Intatheli ikhulumisane lomama okubikwa wayehlukunyezwa yisitho lesi oziveze ngokuthi nguMaNcube nje wathi ngeke atsho lutho ngoba ngesikhathi kusetshenzwa wayengekho.
