uMthunywa
KULEMULI ye Dora Dombo eMutare ehlezi phezu kwamalahle ngemva kokuba enye yenkomo zabo imane yaqala ukukhuluma osekubangele ukuthi kucatshangelwe ubuthakathi.
Lindaba enzima ukukholwa yenzakala esigabeni se Mambondiani.
Ibuzwa ngodaba lolu enkundleni yayo ngoLwesibili, induna uZimunya ivumile ukuthi kulendaba enjalo esigabeni sayo. Induna yalile ukuveza ibizo lemuli le, ithi labo abafuna ukuzwa ngendaba le bakhululekile ukuvakatshela enkundleni yakhe ngalimpelaviki.
“NgeSonto le sizahlala phansi sizwe silalele icala leli. Bonke abaphatheke ecaleni leli sebebiziwe njalo bakhangelelwe ukuthi babekhona enkundleni,” kutsho induna uZimunya.
Induna ithe ngokwakuqala ukuzwa ngecala elinjalo. Ithe selokhu yathwetshulwa yingwe kayikaze ibone into enjengaleyo.
“Indaba yenkomo ekhulumayo liqiniso sibili. Ikhuluma kuhle nje. Icala lakhona selisenkundleni yami ngakho sizahlala phansi silizwe ngeSonto le. Angikaze ngizwe ngenkomo ekhulumayo, kodwa le iyakhuluma sibili, ikhuluma ulimi lwethu lokuzalwa ngokwalo.
“Lokhu kwenzakala esigabeni se Mambondiani. Okwenzakalayo yikuthi nxa inkomo le ivulelwa ekuseni ukuthi iye emadlelweni iyaqala ukutshinga ithi baphuzelani ukuvulela umhlambi ukuthi uyekudla. Itshinga ngendlala njalo ihle icele lamanzi. Endleleni yokuya emadlelweni inkomo le yiyo ekhokhela ezinye.
“Nxa umfana ozelusayo ezihambisa kwenye indawo ukuthi zidle khona, inkomo le ihle itshinge, itshela umfana ukuthi uzisa emadlelweni angelatshani,” kutsho induna uZimunya.
UZimunya uqhubekele phambili wathi inkomo le iziphatha njengomuntu ohleleke kuhle sibili lemqondweni okwenza izakhamizi zifikewe yikuyesaba. Uthe icala leli lamangalwa kumaviki amabili edluleyo.
“Konke lokhu kutshengisa ubuthakathi lomuthi. Inkomo ayikhulumi. Omunye emulini le udlale ngomuthi omubi ongalunganga ukuze aqinise ibhizimusi yakhe njalo sokusenzakala obekumele kwenzakale. Le yinkundla yesintu njalo silazo indlela zokuxazulula icala leli.
“Inkundla izadinga usizo lwezinyanga ukuze kutholakale impande zenkulumo ekhulunywa yisifuyo lesi.
Ngemva komsebenzi ozakwenziwa zinyanga imbangela yalokhu izavela njalo labo ababanjiweyo bazalabhela emoyeni lo ofuna imbadalo,” kutsho induna uZimuto.
Induna uZimunya ithe kulezehlakalo ezinengi ezingazwisisekiyo ezenzakala esigabeni kodwa inkundla yenduna yazilungisa.
“Imuli le ethintwa yilokhu iyakwazi okwenzakalayo njalo amalunga emuli le agcona uyise ngokubangela umnyama. Ubaba lo ogconwayo laye uyabuya enkundleni njalo sizabakwazi ukuthi yini eyenzakalayo ngemva kokuthethwa kwecala leli,” kuphetha induna uZimunya. — Manica Post
