uMthunywa
Ethel Ncube
KULENDODA yeGwampa eLupane elokhe isathoba amanxeba ngemva kokutshiswa ngumkayo kubangwa omakhwapheni.
Isindabaphenduli le yenzakale emavikini amabili adluleyo lapho uNomusa Moyo efake amanzi ngesikali wathela uMnu Bongani Sibanda bebanga umakhwapheni.
Ekhuluma loMthunywa omunye welunga lemuli oziveze ngokuthi nguMaSibanda kuphela uchaze ukuba ababili laba sebelesikhathi behluphana.
“Mina umakoti uhlala ebuya ezongibikela ukuthi indoda ayikhombisi nje ithela amanzi. Uhlala ekhala ezimathonsi ethi uyaphuza ukufika ekhaya amtshele athi ubekwejisile kwamanye amadoda.
“Okwakhathesi uMaMoyo ubesekhathele njalo ethukuthele wafikelwa ngumoya omubi nanko phela ubilise amanzi wathela umkakhe ngawo ethi uzama ukuthi achume ngoba emthole elejazi labakhwenyana elisebenzileyo esikhwameni. Ukutshisa umuntu licala, ngiyamangala ukuthi kungani engabotshwanga,” kutsho uNkszn Sibanda.
UMthunywa uphinde waxhumana lesinye isakhamuzi uMnu Velani Siwela owafika ngesikhathi uMnu Sibanda esanda kutsha.
“Ngezwa inkalakatha yendoda ihlaba umkhosi ngagijima ngayakhona ngathola imilenze ingokunye. Ngathi ngibuza umfazi wangiphendula wathi umtshisele isitho sakhe esihlala simile singabona izidwedwe, lami kwahle kwangikhama ukuthi ngizathini. Ukutsha watsha okuzwayo sibili,” kubika uMnu Siwela.
Iphephandaba likazulu likhulumisane lalowo owatshisa umkakhe uNkosazana Nomusa Sibanda ovumileyo ukuba wamthela ngamanzi.
“Yazi lapha ukhuluma lendlovu elenxeba, nxa ubuza uyangithunuka. Ubaba lo sengidiniwe ngokuhamba ekhombisa uzaze alale lesipoko ngokuhamba egxumeka isitho sakhe lapha lalapha. Ngabilisa amanzi ngamthoba mbijana ukuthi azwe ubuhlungu engibuzwayo, ikhondomu ungalisebenzisa uyalahla, ukugcina lokhu kutshengisa ukuthi uyadelela.”
UMthunywa uphinde wakhulumisana lobaba lo owalileyo ukuba bamtshisela omakhwapheni.
“Angikhulumi izinto zomuzi wami lomuntu engingamaziyo mina. Nxa ngatsha kungadubi muntu njalo okwabomakwapheni lekhondomu ngikuzwa ngawe,” kuphetha uMnu Sibanda.
