uMthunywa
YiNtatheli kaMthunywa
NGESONTO mhla kuhlangana amalunga eHighlanders, uEzra Tshisa Sibanda ubike ukuthi uzabatshela zigcwale.
Usaziwayo lo uthe sekuyisikhathi sokuba iqembu leli ligumule amalunga ebhodi kulandelwe isisekelo sombuso esitsha.
USibanda ukhulume lokhu engafihli ukuba iBosso ifuna ukugeziswa ngoba akula ngitsho loyedwa kubakhokheli bayo ongelacala.
Ukhulume lokhu ngesikhathi echaza akhangelele ukuthi kuphathwe ngumhlangano womnyaka owe-AGM ozaqhutshelwa e-Club House ekuseni.
“Lo ngumhlangano obaluleke kakhulu. Ngiwulinde ngamehlo abomvu umhlangano wethu womnyaka njengamalunga eqembu leHighlanders FC. Umhlangano lo kumele ulungisise udaba lwesisekelo sombuso weHighlanders. Akulandelwe i-constitution entsha, kukhitshwe abadala laba okuthiwa yi-board. Kubhalwe egcekeni kusisekelo seqembu ukuthi kumele sikhiphe iqula leli elibizwa kuthiwa yi-board. Kanti vele uncedo lwabo ngolwani?
“Asambeni ngobunengi bethu sonke esingamalunga oqobo siyelungisa iqembu lethu. Isisekelo sombuso esitsha asihlonitshwe ngenxa yokuthi yikho okufunwa ngabantu hatshi ukulandela okufunwa lihlekana,” kutsho uSibanda.
Uqhubeke wathi: “Okwesibili, singaqambelani amanga sithi thina akulamuntu ongelacala kuHighlanders.
Bonke abakhokheli bethu balamacala athile. Kumele batshelwe ngeSonto, senqabele ukukhonjwa lokukhethwa kwabantu abathile ukuthi balecala. Omsulwa kaphakamise isandla simbone.
“Abanye babo badliwa kanengi kukhetho kodwa lokhe behlala phansi betshaya imithetho yeqembu. Kunuka santungwane lapha. Akuguquke konke lokhu nxa sifuna ukuthi iqembu liyephambili.”
Usaziwayo lo uthe akuvulwe amehlo kucetshiswane ngendlela okuqhatshwa ngayo umqeqetshi.
“Ngikhuthaza amalunga ukuthi aqaphele njalo ukuba asiyindawo ngoba iqembu aliphumeleli nxa sivumela i-executive endala ikhetha umqeqetshi. Khangela khathesi, umqeqetshi omutsha wakhethwa singakavoteli abakhokheli abatsha. Kuyaphazamisa.”
USibanda uthe sekufanele umhlangano weAGM wenziwe ngoLwezi nxa isizini iphela.
“Umhlangano wokuguqula inhlelo zethu awenziwe ngoLwezi ngesikhathi siqeda isizini. Kuba lula ukuthi senze izinqumo zomnyaka olandelayo isikhathi sisekhona,” nguTshisa lo.
Kusenjalo, kuyinjwayelo ukuba amalunga azafuna ukwazi ngesimo sesikhwama semali yeqembu. Ngesizini edluleyo ibhanga leBancABC lavalelisa usekelo lwayo kuHighlanders. Kuzalindwa ukubikwa kokungena kosekelo olutsha kulisizini. Iphephandaba likazulu likuzwile ukuba inkampani yeNetOne isifuna ukusekela ezikaMagebhula.
Eminyakeni edluleyo bekulokucabangela okukhulu kwamanye amalunga athi inkokheli zeqembu zingaba zitshayela esikhewini imali etholwa yileliqembu ngoba izikwelede zayo azipheli.
